ہمایوں سعید کی والدہ کا کردار نہیں کروں گی، وہ میرے والد لگیں گے، گل رعنا

ہفتہ 1 مارچ 2025 22:27

لاہور(اُردو پوائنٹ اخبارتازہ ترین - آن لائن۔ 01 مارچ2025ء) سینئر اداکارہ گل رعنا کا کہنا ہے کہ بنیادی طور پر وہ پروڈکشن کا کام کرتی رہی ہیں، جس وجہ سے انہوں نے دیگر اداکاروں کی چپلیں بھی اٹھائیں اور کپڑے بھی استری کیے۔عاصم اظہر کی والدہ گل رعنا حال ہی میں نجی ٹی وی کے شو میں نظر آئیں، جہاں انہوں نے اپنے کیریئر، شوبز انڈسٹری اور نئی اداکاراوں کے ریوں کے حوالے سے کھل کر بات کی۔

ان کا کہنا تھا کہ فن کار یا تو ہوتا ہے یا نہیں ہوتا، اداکاری میں بہتری لائی جا سکتی ہے لیکن اداکاری سکھائی نہیں جا سکتی۔انہوں نے بتایا کہ اداکار کی صلاحیتیں تراشنے کا ہنر ہدایت کار کے پاس ہوتا ہے۔سینئر اداکارہ نے اپنے منفرد کرداروں کا تمام کریڈٹ اپنے ہدایت کاروں کو دیتے ہوئے کہا کہ اگر وہ مجھے الگ الگ کردار آفر نہیں کرتے تو میں کیسے کر پاتی۔

(جاری ہے)

انہوں نے بتایا کہ جب میں سیٹ پر نوجوان اداکاراوں کے تلخ رویے دیکھتی ہوں تو منہ پر انہیں جواب دے دیتی ہوں۔ان کا کہنا تھا کہ اگر میرے سامنے کوئی اداکارہ نامناسب رویہ اپنائے تو کہہ دیتی ہوں کہ یہ ٹھیک نہیں۔کیریئر میں مشکلات کے حوالے سے ان کا کہنا تھا کہ مشکلات تو بہت آئیں تاہم، کامیابی کا اصل مزہ سختیوں کے بعد ہی آتا ہے۔انہوں نے بتایا کہ جس نے غم نہیں دیکھا اسے خوشی کا احساس نہیں ہو سکتا۔

گل رعنا کا کہنا تھا کہ ہمایوں سعید کی ماں کا کردار کبھی نہیں نبھاوں گی، کیوں کہ وہ ان کے والد لگیں گے۔گل رعنا کا کہنا تھا کہ پروڈکشن میں ہونے اور ٹی وی میں سینیئر پروڈیوسر کی ملازمت کے دوران انہوں نے اداکاروں کی چپلیں بھی اٹھائیں اور کپڑے بھی استری کیے۔انہوں نے بتایا کہ میرا تعلق بنیادی طور پر اداکاری سے نہیں پروڈکشن سے ہے، 2008 تک وہ بطور سینئر پروڈیوسر کام کر تی رہیں۔شادی اور محبت کے حوالے سے بات کرتے ہوئے ان کا کہنا تھا کہ یکطرفہ محبت سب سے بڑی بیوقوفی ہے۔گل رعنا نے بتایا کہ میری شادی یکطرفہ محبت پر مبنی اور میری بے وقوفی تھی۔