زرمبادلہ کے ملکی ذخائرمیں جاری مالی سال کے پہلے 8 ماہ میں مجموعی طور پر 1.929 ارب ڈالر کا نمایاں اضافہ

پیر 3 مارچ 2025 16:37

اسلام آباد (اُردو پوائنٹ اخبارتازہ ترین - اے پی پی۔ 03 مارچ2025ء) زرمبادلہ کے ملکی ذخائرمیں جاری مالی سال کے پہلے 8 ماہ میں مجموعی طور پر 1.929 ارب ڈالر کا نمایاں اضافہ ریکارڈکیاگیا ہے۔

(جاری ہے)

سٹیٹ بینک کی جانب سے جاری کردہ اعدادوشمار کے مطابق گزشتہ مالی سال کے اختتام پر زرمبادلہ کے ملکی ذخائر کاحجم 13.99 ارب ڈالر ریکارڈکیاگیا تھا جس میں سٹیٹ بینک کے پاس زرمبادلہ کے ذخائر کا حجم 9.39 ارب ڈالر اور بینکوں کے پاس 4.607 ارب ڈالر تھا۔

21 فروری کو ختم ہونےوالے ہفتے میں زرمبادلہ کے ملکی ذخائر کا حجم 15.92 ارب ڈالر ریکارڈکیاگیا جس میں سٹیٹ بینک کے پاس زرمبادلہ کے ذخائر کا حجم 11.22 ارب ڈالر اور کمرشل بینکوں کے پاس 4.703 ارب ڈالر تھا۔ جاری مالی سال کے آغازسے لے کر اب تک سٹیٹ بینک کے ذرمبادلہ کے ذخائر میں 1.833 ارب ڈالر اور بینکوں کے زرمبادلہ کے ذخائر میں 96 ملین ڈالر کا اضافہ ریکارڈکیاگیا ہے۔