ملکی ایکسپورٹس میں بہت بڑی کمی

صرف 1 ماہ میں ملکی ایکسپورٹس میں نصف ارب ڈالرز سے زائد کی کمی ہو جانے کا انکشاف

محمد علی پیر 3 مارچ 2025 22:32

لاہور (اُردو پوائنٹ اخبارتازہ ترین۔ 03 مارچ2025ء) ملکی ایکسپورٹس میں بہت بڑی کمی، صرف 1 ماہ میں ملکی ایکسپورٹس میں نصف ارب ڈالرز سے زائد کی کمی ہو جانے کا انکشاف۔ تفصیلات کے مطابق رواں مالی سال 2024-25کے پہلے8 ماہ (جولائی تا فروری)کے دوران ملک کا تجارتی خسارہ 6.33 فیصد اضافے کے ساتھ 15 ارب 78 کروڑ ڈالر تک پہنچ گیا، گذشتہ ماہ (فروری2025) کے دوران ملکی ایکسپورٹس میں 17.35 فیصد کمی ریکارڈ کی گئی۔

وفاقی ادارہ شماریات کی جاری کردہ رپورٹ کے مطابق گزشتہ ماہ (فروری) میں ایکسپورٹس کا حجم 2 ارب 43 کروڑ 90 لاکھ ڈالر رہا ہے جو جنوری 2025 میں 2 ارب 95 کروڑ ڈالر تھا جبکہ فروری2025 میں درآمدات بھی 9.89 فیصد کم ہو کر 4 ارب 73 کروڑ ڈالر رہیں، جبکہ جنوری میں یہ حجم اس سے زیادہ تھا۔ رپورٹ کے مطابق رواں مالی سال جولائی تا فروی کے دوران ایکسپورٹس میں مجموعی طور پر 8.17 فیصد اضافہ ہوا ہے اور یہ 22 ارب ڈالر سے تجاوز کر گئی ہیں، اعدادوشمار میں مزید بتایا گیا ہے کہ رواں مالی سال کے پہلی8 ماہ میں تجارتی خسارہ 6.33 فیصد اضافے کے ساتھ 15 ارب 78 کروڑ ڈالر تک پہنچ گیا ہے۔

(جاری ہے)

اس دوران درآمدات میں 7.4 فیصد اضافے کے ساتھ مجموعی حجم 37 ارب 80 کروڑ ڈالر تک جا پہنچا ہے، اس طرح فروری 2024 کے مقابلے میں گزشتہ ماہ برآمدات میں 5.57 فیصد کمی دیکھی گئی ہے۔ رپورٹ کے مطابق ملکی ایکسپورٹس فروری 2025 میں ماہانہ 17.4 فیصد اور سالانہ 5.60 فیصد کمی ہوئی، فروری 2025 میں ملکی ایکسپورٹس 2 ارب 40 کروڑ ڈالر رہیں۔ رواں مالی سال کے پہلے 8 ماہ میں تجارتی خسارہ 6.30 فیصد اضافے سے 15.80 ارب ڈالر رہا، رواں مالی سال 8 ماہ میں ایکسپورٹس 8.2 فیصد اضافے سے 22.02 ارب ڈالر رہیں۔ رپورٹ کے مطابق رواں مالی سال کے 8 ماہ میں درآمدی بل 7.40 فیصد اضافے سے 37.80 ارب ڈالر پر پہنچ گیا ہے۔