ای بز پورٹل پر کاروباری افراداور شہریوں کیلئے این او سی کے آن لائن حصول کا عمل سادہ بنایا جائیگا،چیف سیکرٹری پنجاب

لاہور (اُردو پوائنٹ اخبارتازہ ترین - اے پی پی۔ 05 مارچ2025ء) چیف سیکرٹری پنجاب زاہد اختر زمان نے تمام سرکاری محکموں کواین او سی کااجرا آسان بنانے کا حکم دیتے ہوئے کہا ہے کہ ای بز پورٹل پر کاروباری افراداور شہریوں کیلئے این او سی کے آن لائن حصول کے عمل کو سادہ بنایا جائیگا۔انہوں نے یہ احکامات بدھ کو یہاں سول سیکرٹریٹ میں منعقدہ انتظامی سیکرٹریز کے اجلاس کی صدارت کرتے ہوئے جاری کئے جس میں صوبہ میں ای گورننس اور پرائس کنٹرول اقدامات کا تفصیلی جائزہ لیاگیا۔

اجلاس سے خطاب کرتے ہوئے چیف سیکرٹری نے کہا کہ این ا و سی کے اجراء کیلئے غیر متعلقہ کاغذات کی طلبی کا کوئی جواز نہیں، این اوسی کے آن لائن اجرا کیلئے صرف ضروری کاغذات طلب کئے جائیں۔ انہوں نے کہا کہ گورننس کی بہتری اور کرپشن کا خاتمہ صرف ٹیکنالوجی کے ذریعے ہی ممکن ہے۔

(جاری ہے)

ا نہوں نے ہدایت کی کہ خدمات کی آن لائن فراہمی کیلئے محکموں کی ڈیجیٹائزیشن کو جلد مکمل کیا جائے۔

چیف سیکرٹری نے صوبہ میں نا جائز منافع خوروں کیخلاف کریک ڈائون جاری رکھنے سے متعلق بھی ہدایات جاری کیں۔ انہوں نے کہا کہ گرانفروشوں کیخلاف کارروائیوں سے متعلق رپورٹ روزانہ کی بنیاد پر بھجوائی جائی۔ انہوں نے کہا کہ قیمتوں میں استحکام کیلئے اضلاع میں ڈپٹی کمشنرز اشیا کے نرخوں، طلب اور رسد کا تقابلی جائزہ لیں، رمضان المبارک میں عوام کو ریلیف کی فراہمی کیلئے انتظامی افسران اپنے فرائض عبادت سمجھ کر سر انجام دیں۔

اس موقع پر سیکرٹری پرائس کنٹرول اور چیئرمین پی آئی ٹی بی نے اجلاس کو تفصیلی بریفنگ دی۔سیکرٹری پرائس کنٹرول نے بتایا کہ وزیر اعلی پنجاب کی ہدایت پرماہ صیام میں اشیا خورونوش کی قیمتوں کی کڑی نگرانی کی جا رہی ہے اور چیکنگ کیلئے پرائس کنٹرول مجسٹریٹس کو فیلڈ میں متحرک کر دیا گیا ہے۔ انہوں نے کہا کہ منگل کو صوبہ بھرمیں 15ہزار سے زائد انسپکشنز کی گئیں۔

چیئرمین پی آئی ٹی بی نے بریفنگ کے دوران بتایا کہ وزیر اعلی پنجاب کے ویژن کے مطابق صوبہ میں ای گورننس کے فروغ کیلئے اقدامات کئے جا رہے ہیں۔اجلاس میں سینئر ممبر بورڈ آف ریونیو، چیئرمین پی اینڈ ڈی، تمام محکموں کے سیکرٹریز اور ڈائریکٹر جنرلز نے شرکت کی جبکہ ڈویژنل کمشنرز اور ڈپٹی کمشنرز ویڈیو لنک کے ذریعے شریک ہوئے۔