مارچ کے وسط تک بہاریہ کماد کی کاشت کی صورت شرح بیج4 آنکھوں والے 13 سے15 ہزار سمے رکھی جائے، محکمہ زراعت

فیصل آباد (اُردو پوائنٹ اخبارتازہ ترین - اے پی پی۔ 06 مارچ2025ء) محکمہ زراعت نے کاشتکاروں کومارچ کے وسط تک بہاریہ کماد کی بروقت کاشت کی صورت میں شرح بیج4 آنکھوں والے 13 سے15 ہزار سمے رکھنے اوربہاریہ کماد کی ترقی دادہ اقسام کاشت کرنے کی ہدایت کی ہے جس سے بہتر پیداوار کا حصول یقینی بنایا جا سکتاہے۔ ڈائریکٹر محکمہ زراعت توسیع فیصل آباد چوہدری خالد محمود نےایک بیان میں کہا کہ بہاریہ کماد کی اگیتی تیار ہونے والی اقسام میں سی پی ایف 243، ایچ ایس ایف240، ایچ ایس ایف 242،سی پی 77-400،سی پی 43-33،سی پی ایف 237 وغیرہ اور درمیانی تیار ہونے والی اقسام میں ایس پی ایف 245-، ایس پی ایف234،ایس پی ایف213،سی پی ایف 246اورسی پی ایف 247 وغیرہ شامل ہیں جبکہ سی اوجے 84پچھیتی تیار ہونے والی قسم ہے۔

انہوں نے کہاکہ ایس پی ایف 234صرف راجن پور، بہاول پور اور رحیم یار خان کے اضلاع کےلئے موزوں ترین قسم ہے۔

(جاری ہے)

ان کا کہنا تھا کہ یہ اقسام اچھی پیداوارکی حامل ہیں اور بیماریوں کے خلاف قوت مدافعت رکھتی ہیں۔انہوں نے کہا کہ ٹرایئٹان سی او ایل 54,سی او 1148 انڈین سی او ایل 29،سی او ایل 44،بی ایل 4، ایل 116،ایل 118،ایس پی ایف 238، اور بی ایف 162 ممنوعہ اقسام ہیں کیونکہ یہ اقسام بیماریوں کے خلاف قوت مدافعت نہیں رکھتیں۔

انہوں نے بتایاکہ بہاریہ کماد کی کاشت کا موزوں وقت مارچ کے وسط تک ہے اور فصل کےلئے شرح بیج بروقت کاشت کی صورت میں 4 آنکھوں والے 13 سے15 ہزار سمے یا تین آنکھوں والے 17 سے20 ہزار سمے ہیں نیز یہ تعداد گنے کی موٹائی کے لحاظ سے تقریباً 100 سے 120 من بیج سے حاصل کی جاسکتی ہے تاہم اگر کاشت میں تاخیر ہو جائے تو بیج کی مقدار میں 10 سے15 فیصد اضافہ کردینا چاہیے۔

انہوں نے بتایا کہ فیصل آباد ڈویژن کے چاروں اضلاع فیصل آباد، جھنگ،ٹوبہ ٹیک سنگھ،چنیوٹ سمیت پنجاب میں کماد کی بہاریہ کاشت کے رقبہ میں 43ہزار ایکڑ کا اضافہ کردیا گیاہے جس کے باعث گزشتہ سال کے 18لاکھ 10ہزار ایکڑ کے مقابلے میں اس بار 18لاکھ 53ہزار ایکڑ سے زائدرقبہ پر15مارچ تک بہاریہ کماد کی کاشت یقینی بنائی جائے گی۔ انہوں نے بتایاکہ جدید پیداواری ٹیکنالوجی کے استعمال سے بہاریہ کماد کے کھیتوں سے فی ایکڑ 621 سے 625من فی ایکڑ تک پیداوار حاصل ہونے کاامکان ہے۔

انہوں نے بتایاکہ اس طرح مارچ کے وسط تک کاشتہ بہاریہ کماد کی کاشت سے روا ں سال 4کروڑ 10لاکھ ٹن سے 4کرو ڑ 40لاکھ ٹن تک پیداوارحاصل کرنے کاہدف مقرر کیاگیاہے۔ انہوں نے بتایاکہ کماد کی بہاریہ فصل کی کاشت کاموزوں ترین وقت وسط مارچ تک ہے۔