وزیر اعلی پنجاب کے ویژن کے تحت سٹرس کی بحالی و ترویج کیلئے اقدامات اٹھائے جا رہے ہیں،سید عاشق حسین کرمانی

لاہور (اُردو پوائنٹ اخبارتازہ ترین - اے پی پی۔ 06 مارچ2025ء) وزیر زراعت و لائیو سٹاک پنجاب سید عاشق حسین کرمانی نے کہا ہے کہ وزیر اعلی پنجاب کے ویژن کے تحت سٹرس کی بحالی و ترویج کیلئے اقدامات اٹھائے جا رہے ہیں، سٹرس کی بحالی حکومت پنجاب کی ترجیحات میں شامل ہے، سٹرس کے باغات موسمیاتی تبدیلیوں کے باعث تنزلی کا شکار اور اس کے پودے مختلف بیماریوں میں مبتلا ہیں جس کے باعث سٹرس خاص طور پر کینو کے پھل کا سائز اور اس کی شیلف لائف میں کمی واقع ہوئی ہے۔

سٹرس فیملی میں کینو خاص طور پر صوبہ پنجاب کی پہچان ہے۔انہوں نے یہ باتیں اپنی زیرصدارت اجلاس سے خطاب کرتے ہوئے کہیں جس میں پارلیمانی سیکرٹری برائے زراعت اسامہ خان لغاری، نائب کنوینیئر سٹرس ڈویلپمنٹ ٹاسک فورس پنجاب محسن شاہ نواز رانجھا،سیکرٹری زراعت پنجاب افتخار علی سہو اور سیکرٹری انڈسٹریز کامرس اینڈ انوسٹمنٹ عمر مسعود نے شرکت کی۔

(جاری ہے)

صوبائی وزیر نے کہا کہ وزیر اعلی پنجاب کسان پیکج کے تحت سٹرس کی بحالی کیلئے1.2 ارب روپے کی خطیر رقم مختص کی گئی ہے جس کا مقصد نہ صرف سٹرس کی سرٹیفائیڈ نرسریوں اور نئے باغات کا قیام عمل میں لانا ہے بلکہ اس منصوبہ کے تحت سٹرس کی پیداوار اور برآمدات میں بھی اضافہ کرنا مقصود ہے تاکہ ملکی معیشت کومستحکم کیا جا سکے۔ وزیر زراعت پنجاب نے مزید کہا کہ سٹرس کی بحالی کے پروگرام کا مقصدجدید زرعی ٹیکنالوجی کے استعمال سے سٹرس کے سرٹیفائیڈ پودوں کی تیاری اور کاشتکاروں کی فنی راہنمائی ہے،اس مقصد کیلئے صوبہ پنجاب میں باغبانوں کی نرسریوں کو باقاعدہ طور پر رجسٹرڈ کیا جائے گا تاکہ سٹرس کے سرٹیفائیڈ پودوں کے ذریعے پیداوار اور معیار میں اضافہ کیا جا سکے۔

صوبائی وزیر نے ہدایت کرتے ہوئے کہا کہ سٹرس کے پوسٹ ہارویسٹ نقصانات میں کمی کیلئے ایک جامع حکمت عملی مرتب اور باغبانوں کو پودوں کی مناسب وقت پر شاخ تراشی بارے فنی راہنمائی فراہم کی جائے۔ انھوں نے کہا کہ سٹرس ریسرچ انسٹیٹیوٹ سرگودھا کو مزید فعال کرنے کے لئے فنڈز فراہم کیے جا رہے ہیں تاکہ بہتر اقسام کے بیج اور نئی تکنیکیں متعارف کروا کر پیداوارمیں اضافہ کیا جا سکے،اس ضمن میں سرگودھا میں ایک بڑے رقبے پر سٹرس بحالی کیلئے ٹارگٹڈ پروگرام شروع اورسٹرس کے باغات کیلئے نئے علاقے مثلا تھل، ڈی جی خان وغیرہ کا جامع سروے کیا جائے۔

اس موقع پر صوبائی وزیر زراعت نے سٹرس کی بحالی کیلئے نائب کنوینئر محسن شاہ نواز رانجھا کی سربراہی میں سب کمیٹی تشکیل دینے اور سٹرس کے تمام اسٹیک ہولڈرز کے ساتھ مشاورت کرنے کے بعد قابل عمل تجاویز کو حتمی سفارشات کی صورت میں وزیر اعلی پنجاب کو منظوری کیلئے بھجوانے کی ہدایت کی۔ سیکرٹری زراعت پنجاب افتخار علی سہو نے کہا کہ سٹرس کے معیاری اور کم قیمت پودوں کی دستیابی کو یقینی بنایا جا رہا ہے،اس کے علاوہ سٹرس کے باغات میں بیماریوں کے انسداد کے لئے بھی ترجیحی بنیادوں پر اقدامات کئے جا رہے ہیں تاکہ زیادہ پیداوار کا حصول ممکن بنایا جا سکے۔

اجلاس میں اسپشل سیکرٹری زراعت آغا نبیل اختر، ایڈیشنل سیکرٹری زراعت پلاننگ کیپٹن(ر) وقاص رشید، ڈائریکٹر جنرلز زراعت ساجد الرحمان، نوید عصمت کاہلوں، پلاننگ اینڈ ڈویلپمنٹ بورڈ کے نمائندگان ،سٹرس ایکسپورٹرز، ماہرین و دیگر اسٹیک ہولڈرز نے شرکت کی ۔