بہاریہ مکئی کی کاشت کےلئے بھاری میرا زمین کا انتخاب موزوں ہے، محکمہ زراعت

جمعہ 7 مارچ 2025 11:21

سیالکوٹ (اُردو پوائنٹ اخبارتازہ ترین - اے پی پی۔ 07 مارچ2025ء) محکمہ زراعت سیالکوٹ نے کاشتکاروں کوبہاریہ مکئی کی کاشت 20مارچ تک مکمل کرنے کی ہدایت کی ہے۔محکمہ کے ترجمان نے کہا ہے کہ کاشتکار بہاریہ مکئی کی کاشت کے لئے زمین کے انتخاب اور اس کی تیاری پر خصوصی توجہ دیں تاکہ بمپر کراپ کے حصول میں مدد مل سکے۔ انہوں نے کہاکہ بہاریہ مکئی کی کاشت جو جنوری کے دوسرے پندرواڑے کے آغاز پر شروع ہوتی ہے کے لئے ایسی بھاری میرا زمین کا انتخاب ضروری ہے جو پانی کو بخوبی جذب کرنے کی صلاحیت رکھتی ہو نیز ایسی زمین جس میں برسیم یا آلو کاشت کئے گئے ہوں وہاں مکئی کی فصل بہتر نشو ونما پاتی ہے۔

انہوں نے بتایاکہ کلراٹھی، ریتلی اور سیم زدہ زمین کے علاوہ ایسی زمین جس کی پی ایچ 8سے زائد ہومکئی کی کاشت کے لئےموزوں نہیں۔

(جاری ہے)

انہوں نے بتایا کہ جس زمین میں مکئی کاشت کرنی ہو اس کے اردگرد درخت نہیں ہونے چاہئیں کیونکہ درختوں کے سائے میں مکئی کی فصل کامیابی کے ساتھ نہیں اگائی جاسکتی۔انہوں نے مزید بتایا کہ بہاریہ مکئی کی کاشت کے لئے زمین کی تیاری بھی اچھی طرح کرلینی چاہیے کیونکہ اگر مکئی آلو والے کھیتوں میں کاشت کرنی ہو تو دویا تین ہل چلا کر سہاگہ دینے سے زمین نرم اور بھربھری ہوجائیگی تاہم اگر کپاس کماد یا سورج مکھی والے وڈھ میں کاشت کرنا ہو تو وڈھ وغیرہ میں روٹا ویٹر چلاکر وڈھ کو اچھی طرح تلف کرنے کے بعد تین مرتبہ ہل چلا کر سہاگہ دینا بھی ضروری ہے۔

انہوں نے کہاکہ اس ضمن میں مزید معلومات، مشاورت، رہنمائی کے لئے ماہرین زراعت، محکمہ زراعت کے فیلڈ سٹاف یا فری ایگریکلچرل ہیلپ لائن سے بھی رابطہ کیا جا سکتاہے۔