90 کی دہائی کا لونڈا، محمد حفیظ کے بیان پر وقار یونس کا ردعمل آگیا

وقار یونس نے پاکستان کے 1990ء کی دہائی کے کرکٹ لیجنڈز پر حفیظ کی تنقید کا جواب سوشل میڈیا پوسٹ کے ذریعے دیا

ذیشان مہتاب جمعہ 7 مارچ 2025 15:02

90 کی دہائی کا لونڈا، محمد حفیظ کے بیان پر وقار یونس کا ردعمل آگیا

لاہور (اردو پوائنٹ تازہ ترین اخبار ۔ 7 مارچ 2025ء ) قومی ٹیم کے سابق کپتان محمد حفیظ کے نائنٹیز کے لیجنڈ کرکٹرز سے متعلق بیان پر وقار یونس کا ردعمل آگیا۔

سابق فاسٹ بولر نے سماجی رابطے کی سائٹ ایکس (ٹوئٹر) پر ٹوئٹ کرتے ہوئے سوئنگ کے سلطان وسیم اکرم کیساتھ تصویر شیئر کرتے ہوئے لکھا کہ 90 کی دہائی کا لونڈا!۔ اس پوسٹ میں وقار یونس نے سابق کپتان وسیم اکرم اور اپنے اسٹیٹس شیئر کیے جس کے مطابق اس جوڑی نے 191 ٹیسٹ، 618 ون ڈے انٹرنیشنلز، 1705 وکٹیں، 8 ہزار 594 رنز، 5 وکٹیں 66 بار اور 10 وکٹیں ایک میچ میں لینے کا کارنامہ 10 بار سرانجام دے چکے ہیں۔

سابق کرکٹر نے ہیش ٹیگ کا استعمال کرتے ہوئے ناٹ بیڈ بھی لکھا اور وسیم اکرم بھی پوسٹ میں ٹیگ کیا۔

قبل ازیں گزشتہ روز ایک اور سابق کپتان محمد حفیظ نے بھی سوال اٹھایا تھا کہ نائنٹیز کی ٹیم نے پاکستان کئی میگا اسٹارز دیے تاہم انہوں نے ہمیں کوئی آئی سی سی ایونٹ نہیں جتوایا، 1996ء میں پرفارمنس خاطر خواہ نہیں رہی، 1999ء کے فائنل میں پہنچے جبکہ 2003ء کے ورلڈکپ میں پہلے ہی راؤنڈ سے باہر ہوکر قوم کا سر شرم سے جُھکا دیا۔

(جاری ہے)

انہوں نے شعیب اختر سے سوال کیا کہ بتائیں ہمارے نوجوان کرکٹرز کو 90 کی دہائی کے کرکٹرز کون سا ایونٹ جتوا کر دیا، وہ میگا سپر اسٹارز ضرور تھے کوئی ٹورنامنٹ نہیں دے سکے۔

واضح رہے کہ محمد حفیظ کی ویڈیو سوشل میڈیا پلیٹ فارمز پر تیزی سے وائرل ہوئی تھی۔