سیالکوٹ، محکمہ زراعت نے گندم کی بہتر نگہداشت کے لئے سفارشات جاری کر دیں

جمعہ 7 مارچ 2025 17:44

سیالکوٹ (اُردو پوائنٹ اخبارتازہ ترین - اے پی پی۔ 07 مارچ2025ء) محکمہ زراعت پنجاب نے گندم کی بہتر نگہداشت کے لئے سفارشات جاری کر دیں ہیں ۔اسسٹنٹ ڈائریکٹر محکمہ زراعت(توسیع)سیالکوٹ کے مطابق گندم کو دانہ بننے کی ابتدا ء یعنی دودھیا حالت پر پانی ضرور لگائیں۔یہ سٹے میں دانے بننے اور بھرنے کا وقت ہوتا ہے۔اگر اس مرحلے پر پانی نہ دیا جائے یا تاخیر سے دیا جائے تو دانے کا سائز چھوٹا رہ جاتا ہے اور پیداوار میں کمی واقع ہو جا تی ہے۔

(جاری ہے)

گندم کی فصل پر کنگی کا حملہ سب سے پہلے کھیت کے کچھ حصوں پر ٹکڑیوں کی صورت میں ظاہر ہوتا ہے اور پھر وہاں سے پورے کھیت میں پھیل جاتا ہے۔ لہٰذا گندم کے کاشتکار باقاعدگی کے ساتھ اپنی فصل کا معائنہ کرتے رہیں۔ کنگی کے حملہ کی صورت میں صرف متاثرہ حصوں پر ہی محکمہ زراعت (توسیع) کے مقامی زرعی ماہرین کے مشورہ سے مناسب پھپھوندی کش زہروں کا سپرے کریں۔انہوں نے مزید کہا کہ گندم پر سست تیلے کا حملہ فروری کے آخر میں عمومی طور پر مشاہد ہ میں آتا ہے اور مارچ کے آخر تک شدت اختیار کر جاتا ہے۔ گندم پر سست تیلے کے حملہ کی صورت میں کاشتکار زرعی زہریں ہرگز استعمال نہ کریں۔ زہر کی بجائے صرف ٹھنڈے پانی کا سپرے کریں۔