رایا، سرسوں اور کینولہ کی بروقت برداشت زیادہ پیداوار حاصل کرنے کیلئے ضروری ہے، محکمہ زراعت سیالکوٹ

پیر 10 مارچ 2025 12:40

سیالکوٹ (اُردو پوائنٹ اخبارتازہ ترین - اے پی پی۔ 10 مارچ2025ء) ڈپٹی ڈائریکٹر محکمہ زراعت (توسیع) سیالکوٹ ڈاکٹررانا قربان علی خان نے کہا ہے کہ رایا،سرسوں اور کینولہ کی بروقت برداشت زیادہ پیداوار حاصل کرنے کیلئے ضروری ہے۔اے پی پی سے گفتگو کرتے ہوئے انہوں نے بتایا کہ ہمارے ملک میں تیل پیدا کرنے والی روایتی فصلیں رایا،سرسوں اور کینولا پیداوار کے اعتبار سے کپاس کے بعد دوسرے نمبر پر ہیں۔

ربیع کے موسم میں کاشت کی گئی رایا،سرسوں اور کینولا کی اقسام مارچ کے آخر ی ہفتے میں پک کر تیار ہو جاتی ہیں۔کینولا کی زیادہ تر اقسام میں فصل بیک وقت پک جاتی ہے اور اچھی پیداوار دیتی ہے۔کینولا کی فصل میں 50 سے 60 فیصد پھلیاں بھورے رنگ کی ہو جائیں تو فصل کی کٹائی کرلینی چاہیے جبکہ رایا کی فصل 60 سے 70 فیصد پھلیاں بھوری ہونے پر کٹائی کر لینی چاہیے۔

(جاری ہے)

انہوں نے مزید بتایا کہ اگر کٹائی میں دیر کی جائے تو دانے گرنا شروع ہوجاتے ہیں۔ اس لیے بروقت کٹائی زیادہ پیداوار حاصل کرنے کے لیے ضروری ہے۔ فصل کو کٹائی کے بعد گہائی کے لیے 6 سے 7 دن تک دھوپ میں خشک کریں۔ گہائی کرنے سے پہلے جگہ کو صاف کرکے اچھی طرح کوٹ کر پکی کرلیں یا گیلی مٹی کے ساتھ لپائی کرلیں تاکہ دانے مٹی میں شامل نہ ہوجائیں حسب ضرورت مہارے لگالیں۔

اس کے بعد تھریشر یا ڈنڈوں کی مدد سے گہائی کریں۔ بیج کو ذخیرہ کرنے کے لیے مزید کچھ دن دھوپ میں سکھائیں یہاں تک کہ بیجوں میں نمی کی مقدار 8 تا 10 فیصد سے زیادہ نہ رہ جائے۔ بیج میں نمی کا تناسب چیک کرنے کے لیے کچھ دانوں کو دانت کے نیچے رکھ کر چبائیں اگر دانے کڑک کی آواز سے ٹوٹیں تو اِس کا مطلب ہے نمی کا تناسب معیا ر کے مطابق ہے۔ بیج کو خشک کرنے کے بعد ذخیرہ کرلیں۔ کینولا کے بیج میں دیسی اقسام کے بیج کی ملاوٹ نہ ہونے دیں تاکہ اس کا معیار برقرار رہے۔

Facebook Twitter Google + Share on Whatsapp

رایا، سرسوں اور کینولہ کی بروقت برداشت زیادہ پیداوار حاصل کرنے کیلئے ضروری ہے، محکمہ زراعت سیالکوٹ

متعلقہ عنوان :

مزید زراعت کی خبریں