پنجاب میں پہلی مرتبہ سپرسیڈر پراجیکٹ کے مشینی کاشت کے تاریخی دور کا آغاز ، سموگ میں واضح کمی کا امکان ہے،محکمہ زراعت

منگل 11 مارچ 2025 16:17

فیصل آباد (اُردو پوائنٹ اخبارتازہ ترین - اے پی پی۔ 11 مارچ2025ء) محکمہ زراعت پنجاب نے کہا ہے کہ وزیراعلیٰ کے ویژن کے تحت صوبے میں پہلی مرتبہ سپرسیڈر پراجیکٹ کے مشینی کاشت کے تاریخی دور کا آغاز ہوگیا ہے ، اس پراجیکٹ کی لانچنگ سے سموگ میں واضح کمی کا امکان ہے۔نظامت زرعی اطلاعات کے مطابق پنجاب میں 60فیصد سبسڈی پر سپر سیڈر کی فراہمی کا تیسرا مرحلہ شروع کر دیا گیا ہے اور محکمہ زراعت نے کاشتکاروں سے سپر سیڈرز کی فراہمی کے تیسرے فیز کےلئے درخواستیں طلب کر لی ہیں۔

انہوں نے کہا کہ وزیراعلیٰ نے گزشتہ سال ایک ہزار سپرسیڈرزکی قرعہ اندازی کرکے پروگرام کا باقاعدہ آغاز کیا تھاجبکہ دوسرے مرحلے میں 2ہزار سپر سیڈرکی مینو فیکچرنگ کا پراسیس تکمیل کے قریب ہے ، تیسرے مرحلے میں 2ہزار سپر سیڈرزکی فراہمی اکتوبرمیں گندم کی بوائی سے پہلے مکمل کرنے کا ہدف مقررکیا گیا ہے۔

(جاری ہے)

انہوں نے کہا کہ سپر سیڈر کے استعمال سے دھان کی فصل کی باقیات کو زمین میں ہی مکس کر دیا جاتا ہے، پنجاب میں ایک لاکھ 10ہزار ایکڑ سے زائد اراضی پر سپر سیڈر کے ذریعے گندم کے اگاؤ میں بہتری آئی ہے، اس کے ذریعے گندم کے بیج کی متناسب بوائی سے پیداوار میں واضح اضافہ ممکن ہوگا۔

سپر سیڈر کے ذریعے گندم کی فصل کے لئے کھاد اور بیج کی مد میں کروڑوں روپے کی بچت ہوئی۔ ان کا کہنا تھا کہ سپر سیڈر حاصل کرنے والے کاشتکار دیگرکسانوں کو کرائے پر سروسز فراہم کریں گے۔انہوں نے بتایا کہ سپرسیڈر کے تیسرے مرحلے کےلئے65ہارس پاور کے ٹریکٹرکے مالک کاشتکار درخواست دے سکتے ہیں،وہ گھر بیٹھے آفیشل ویب سائیٹ www.agripunjab.gov.pk سے اپلائی کر سکتے ہیں۔

انہوں نے کہا کہ درخواست فارم متعلقہ ایگریکلچر آفیسر، اسسٹنٹ ڈائریکٹر زراعت(توسیع) یا اسسٹنٹ ڈائریکٹر زرعی انجینئرنگ کے دفاتر میں بھی دستیاب ہیں، مزید معلومات اور رہنمائی کےلئے ٹال فری نمبر0800-17000 بھی جاری کر دیا گیا ہے۔انہوں نے کہا کہ ایگری کلچر میکانائزیشن سے پنجاب کی زراعت میں جدت کا خواب حقیقت میں بدل گیاجبکہ سپرسیڈر کے استعمال سے دھان کی باقیات جلانے کے واقعات کا سدباب ہو گا۔

Facebook Twitter Google + Share on Whatsapp

پنجاب میں پہلی مرتبہ سپرسیڈر پراجیکٹ کے مشینی کاشت کے تاریخی دور کا آغاز ، سموگ میں واضح کمی کا امکان ہے،محکمہ زراعت

متعلقہ عنوان :

مزید زراعت کی خبریں