شاہد آفریدی نے شاداب خان کی ٹیم میں واپسی پر سوال اٹھا دیا

لڑکے ٹیم میں کیسے واپس آتے ہیں یہ کسی کو معلوم نہیں، شاداب خان نے ڈومیسٹک کرکٹ میں کونسی پرفارمنس دی ہے : سابق کپتان

ذیشان مہتاب منگل 11 مارچ 2025 12:39

شاہد آفریدی نے شاداب خان کی ٹیم میں واپسی پر سوال اٹھا دیا

کراچی (اردو پوائنٹ تازہ ترین اخبار ۔ 11 مارچ 2025ء) قومی کرکٹ ٹیم کے سابق کپتان اور مایہ ناز آل راؤنڈر شاہد خان آفریدی نے ٹیم میں شاداب خان کی واپسی پر سوال اٹھادیا۔

کراچی میں میڈیا سے گفتگو میں شاہد آفریدی نے کہا کہ لڑکے ٹیم میں کیسے واپس آتے ہیں یہ کسی کو معلوم نہیں، شاداب خان نے ڈومیسٹک کرکٹ میں کونسی پرفارمنس دی ہے۔

انہوں نے کہا کہ میرٹ کے اوپر جب فیصلے نہیں ہوں گے تو چیزیں ایسی چلیں گی، آج جو لڑکے ٹی20 سے باہر ہیں، وہ کل واپس آجائیں گے۔

سابق کپتان نے مزید کہا کہ چیمپئنز ٹرافی فائنل تقریب میں پی سی بی کا نمائندہ نہ بلانا بڑا سوال ہے۔

اُن کا کہنا تھاکہ ہم سارا وقت تیاری کرتے ہیں اور آخر میں سرجری کرتے ہیں، ہماری کرکٹ کافی عرصے سے آئی سی یو میں ہے۔

(جاری ہے)

جیسے ہی نیا چیئرمین آتا ہے وہ سب تبدیل کر دیتا ہے۔

شاہد آفریدی نے یہ بھی کہا کہ ہم بہت تیزی سے کپتان تبدیل کرتے ہیں، کپتان اور کوچز کو وقت دیں ان پر تلوار نہ لٹکائیں۔

انہوں نے کہا کہ سرجریز پلیئرز کی ہو رہی ہیں مینجمنٹ خود کو بچا رہی ہے، کوچز اپنی نوکری بچانے کیلیے کھلاڑیوں پر الزام لگاتے ہیں، جب جیتتے ہیں تو کوچز کریڈٹ خود لیتے ہیں۔

سابق کپتان نے کہا کہ سلمان آغا ون ڈے کا اچھا پلیئر ہے، ٹی ٹوئنٹی میں اس کا سٹرائیک ریٹ کم ہے۔ ان کا کہنا تھا کہ چیئرمین پی سی بی محسن نقوی بہت مثبت آدمی ہیں، وہ کام کرنا چاہتے ہیں لیکن وہ کرکٹ کو نہیں جانتے یہی اُن کا مسئلہ ہے۔

شاہد آفریدی نے کہا کہ میں نے مشورہ دیا ہے کہ ایک کام کرلیں، 3 کام ایک ساتھ نہیں ہوسکتے، کرکٹ بورڈ بڑا کام ہے اس کیلیے مکمل وقت چاہیے ہوتا ہے، ایڈوائزر پر آپ نہیں چل سکتے۔