برطانوی شہزادہ ولیم 20مارچ سے ایسٹونیا کا2روزہ دورہ ،نیٹو آپریشنز میں شامل برطانوی فوجیوں سے ملاقات کریں گے

جمعرات 13 مارچ 2025 17:53

لندن(اُردو پوائنٹ اخبارتازہ ترین - این این آئی۔ 13 مارچ2025ء)برطانوی ولی عہد شہزادہ ولیم اتحادیوں کے ساتھ یکجہتی کا اظہار کرنے اور اتحاد کے مشرقی کنارے کے دفاع کیلئے اپنی وابستگی کو اجاگر کرنے کیلئے برطانوی مہم کے ایک حصے کے طور پر20مارچ سے ایسٹونیا کا2روزہ دورہ کریں گے اور نیٹو آپریشنز میں شامل برطانوی فوجیوں سے ملاقات کریں گے۔

(جاری ہے)

غیرملکی خبررساں ادارے کے مطابق ان کے دفتر کینسنگٹن پیلس نے کہا کہ20مارچ سے شروع ہونے والے دو روزہ دورے کے دوران برطانوی شہزادہ ولیم دارالحکومت ٹالن میں ملاقاتیں بھی کریں گے تاکہ اس بارے میں مزید معلومات حاصل کی جا سکیں کہ یوکرین میں جاری تنازعہ پر ملک نے کس طرح کا ردعمل ظاہر کیا ہے۔

کینسنگٹن پیلس نے کہا کہ شہزادہ ولیم ایسٹونیاکے صدر الار کریس سے بھی ملاقات کریں گے اور قابل تجدید توانائی اور ٹیکنالوجی میں ملک کی اختراعات بارے جانیں گے،آپریشن کیبرٹکے حصے کے طور پر براطنیہ کے ایسٹونیا اور پولینڈ میں مقیم تقریباً 900فوجی ہیں، جو یوکرین بحران کے بعد نیٹو کے مشرقی حصے میں طاقت بڑھانے میں برطانوی شراکت ہے۔