صوابی، پولیس نے راہزنی گینگ میں ملوث ملزم گرفتار کرلیا

قبضے سے چھینی گئی لاکھوں روپے رقم،موبائل فون ، پستول ،موٹرسائیکل برآمد

ہفتہ 15 مارچ 2025 20:15

صوابی (اُردو پوائنٹ اخبارتازہ ترین - این این آئی۔ 15 مارچ2025ء)یارحسین پولیس نے راہزنی گینگ میں ملوث ملزم گرفتار کرکے ان کے قبضے سے چھینی گئی لاکھوں روپے رقم،موبائل فون ، آلہ خوف پستول اور واردات میں استعمال ہونے والی موٹرسائیکل برآمد کرلی۔ ڈی پی او آفس سے جاری پریس ریلیز کے مطابق منہاج سکنہ مردان نے تھانہ میں رپورٹ درج کرتے ہوئے کہا کہ ہم نے اگرائی کے رقم مبلع 09 لاکھ روپے بینک میں جمع کرنے کے لیے جا رہے تھے کہ دیہہ یعقوبی شاخ میں موٹرکار کو روک کر اپنی رقم گن رہے تھے کہ اس دوران موٹرسائیکل سوار 05 افراد آکر ہم سے بذور پستول 09 لاکھ روپے نقدی رقم اور ایک عدد موبائل چھین کر فرار ہوئے جس پر ایس ایچ او یارحسین عبدالولی خان معہ پولیس سب انسپکٹر خائستہ محمد خان و تفتیشی آفسران پر مشتمل ٹیم نے جدید خطوط کو بروئے کار لاتے ہوئے پیشہ وارانہ تفتیش کی بدولت راہزن گروہ کا سراغ لگا لیا۔

(جاری ہے)

ایس ایچ او تھانہ یارحسین عبدالولی خان معہ پولیس ٹیم کی اہم کارروائی کے دوران بین الضلاعی 06 رکنی راہزن گروہ کا رکن محمد طارق خان کو گرفتار کرلیا، گرفتار ملزم ضلع مردان کا رہائشی ہے جس کا تعلق منظم راہزن گروہ سے ہے، ملزم دیگر ساتھیوں کے ہمراہ بمقام میلہ ڈاگہ یعقوبی شاخ پر مدعی مقدمہ منہاج سے اسلحہ کی نوک پر 09 لاکھ نقدی رقم بذور چھین کر فرار ہوئے تھے،جس کے قبضے سے چھینی گئی رقم میں 01 لاکھ روپے اور موبائل فون بھی برآمد کی گئی ہے،جبکہ آلہ خوف پستول اور واردات میں استعمال ہونے والی موٹرسائیکل بھی برآمد کرلی مذکورہ راہزن گروہ راہ چلتے شہریوں سے اسلحہ کی نوک پر نقد رقم،قیمتی موبائل فونز اور دیگر قیمتی اشیا چھیننے میں ملوث ہے، جس نے ابتدائی تفتیش کے دوران راہزنی کی متعدد وارداتوں کا اعتراف کیا ہے،اسی طرح ملزم نے گروہ میں شامل دیگر ساتھیوں کی بھی نشاندہی کی جن کی گرفتاری کی خاطر ڈی ایس پی لاہور کی سربراہی میں خصوصی ٹیم تشکیل دے دی گئی ہے، ملزم سے دوران تفتیش مزید اہم انکشافات کی توقع کی جارہی ہے۔