کاٹی فیکٹری ورکرز کی موٹر سائیکلوں اور بسوں سے متعلق ایس ایس پی ٹریفک کی اہم ہدایات

جمعرات 20 مارچ 2025 17:57

کراچی (اُردو پوائنٹ اخبارتازہ ترین - این این آئی۔ 20 مارچ2025ء) کاٹی فیکٹری ورکرز کی موٹر سائیکلوں اور بسوں سے متعلق ایس ایس پی ٹریفک نے اہم ہدایات جاری کر دی ہیں۔تفصیلات کے مطابق ایس ایس پی ٹریفک کورنگی علی رضا نے چیئرمین اور صدر کاٹی کو علیحدہ علیحدہ خط لکھے ہیں، جن میں کہا گیا ہے کہ کاٹی کے تحت چلنے والی فیکٹری کے ورکرز کی موٹر سائیکلوں کی حالت خراب ہے، ان کی زندگی کی حفاظت کے لیے انھیں ہدایات دی جائیں کہ وہ اپنی موٹر سائیکلیں ٹھیک کروا لیں۔

خط میں ہدایت کی گئی ہے کہ زیادہ تر اسٹاف اپنی موٹر سائیکلیں انتہائی خراب حالت میں چلاتے ہیں، ان کو درست ڈرائیونگ لائسنس، ہیلمٹ کا لازمی استعمال کروائیں، ہیڈلائٹ، ٹیل لائٹ اور انڈیکیٹرز درست حالت میں رکھنے کے ساتھ ساتھ سائیڈ مررز لگائیں اور فینسی نمبر پلیٹ لگانے سے اجتناب کریں، موٹر سائیکل پر 3 افراد بیٹھ کر سفر نہ کریں۔

(جاری ہے)

خط میں کہا گیا ہے کہ عملہ غلط پارکنگ بھی کرتا ہے، ایک لین کی جگہ چار چار لینوں میں پارکنگ کی جاتی ہے، جس سے نہ صرف لوگوں کو تکلیف ہوتی ہے بلکہ ٹریفک جام بھی ہوتا ہے اور حادثات بھی ہوتے ہیں۔

دوسرے خط میں کہا گیا ہے کہ مزدوروں کو لانے لے جانے والی زیادہ تر بسیں اور کوسٹرز جو کنٹریکٹ کی ہیں یا کمپنی اور فیکٹری کی ملکیت ہیں، وہ انتہائی خراب حالت میں ہیں، ان گاڑیوں کی وجہ سے سڑک پر چلنے والی دیگر گاڑیاں خطرے میں پڑ سکتی ہیں۔خط میں ہدایت کی گئی ہے کہ ایک ہفتے کے اندر گاڑیوں کی حالت ٹھیک کروا لیں، گاڑی کے درست فٹنس سرٹیفکیٹ اور ڈرائیور کے لائسنس اپڈیٹ کروائیں، گاڑیوں کی مکینیکل حالت بھی ٹھیک کروائیں، اور گاڑی کے ڈرائیور یا مالکان تعاون کریں، کیوں کہ ایک ہفتے بعد خلاف ورزی کرنے پر قانونی کارروائی کی جا سکتی ہے۔