عاطف خان فراڈ کیس میں نادیہ حسین بڑی بینفشری نکلی

نادیہ حسین اپنے 2 سلون بینک فراڈ کی رقم سے چلاتی رہی، سلون میں بینک فراڈ کے 2 کروڑ 64 لاکھ منتقل کیے گئے،ترجمان ایف آئی اے

جمعہ 21 مارچ 2025 16:38

عاطف خان فراڈ کیس میں نادیہ حسین بڑی بینفشری نکلی

کراچی(اُردو پوائنٹ اخبارتازہ ترین - این این آئی۔ 21 مارچ2025ء)وفاقی تحقیقاتی ادارے (ایف آئی ای)کارپوریٹ کرائم سرکل نے اداکارہ نادیہ حسین کے شوہر عاطف خان گرفتاری کیس میں تحقیقات مکمل کرلی ہیں۔تفصیلات کے مطابق پاکستانی ماڈل اور اداکارہ نادیہ حسین بھی ایف آئی اے کے شکنجے میں آگئیں، شوہر کی گرفتاری کے بعد تحقیقات میں نادیہ حسین فراڈ کیس میں بڑی بینفشری نکلی جس کے بعد ایف آئی اے نے نادیہ حسین کو طلب کرنے کا فیصلہ کرلیا۔

ایف آئی اے کارپوریٹ کرائم سرکل نے تحقیقات میں اہم شواہد حاصل کرلیے ہیں، ایف آئی اے نے انکشاف کیا کہ ماڈل نادیہ حسین اپنے 2 سلون بینک فراڈ کی رقم سے چلاتی رہی، اداکارہ کے سلون میں بینک فراڈ کے 2 کروڑ 64 لاکھ منتقل کیے گئے۔ایف آئی اے ترجمان کے مطابق عاطف خان کے 2 الگ اکائونٹس کے ذریعے بھاری رقوم سلون کے اکائونٹ میں آئی، بھاری رقوم 19 بار الگ وقتوں میں سلون اکائونٹ میں ٹرانسفر ہوئی۔

(جاری ہے)

ایف آئی اے کے مطابق نادیہ حسین کے اکائونٹ میں 2018 سے رقوم منتقل ہورہی تھیں، عاطف خان کے بینک فراڈ کی وجہ سے کمپنی کو 1 ارب 20 کروڑ کا نقصان پہنچا، عاطف خان کمپنی کے پیسوں سے ذاتی اکائونٹس چلاتا تھا۔عاطف خان ذاتی بزنس کا تمام خسارہ بینک کے کھاتے میں ڈال دیتا تھا، عاطف خان نے اپنے خسارے کے 54 کروڑ بینک کے کھاتے میں ڈالے، ملزم عاطف نے 11 کروڑ سے زائد رقم اپنے استعمال میں بھی لی۔