چینی ماہرین سے تربیت و مہارت کیلئے ایک ہزارطلبا اور ماہرین زراعت بھیجیں گے، وزیرخزانہ اورنگزیب

بدھ 26 مارچ 2025 23:00

بیجنگ (اُردو پوائنٹ اخبارتازہ ترین - آن لائن۔ 26 مارچ2025ء)وزیر خزانہ سینیٹر محمد اورنگزیب نے کہا ہے کہ وزیر اعظم کی خواہش پر چینی ماہرین کے ہاتھوں تربیت اور مہارت اور ٹیکنالوجی ٹرانسفر کے لیے پاکستان سے عنقریب ایک ہزار طلبا اور ماہرین زراعت چین بھیجے جائیں گے۔چین کے جنوبی صوبے ہائی نان کے بوآؤ میں منعقدہ بواؤ فورم برائے ایشیا سالانہ کانفرنس 2025 میں شرکت کے دوران چین کے سی جی ٹی این (چائنا گلوبل ٹیلی ویژن نیٹ ورک) اردو سے انٹرویومیں وزیر خزانہ نے دنیا کی دوسری بڑی معیشت کے طور پر چین سے بہت کچھ سیکھنے کی خواہش کا اظہار کیا۔

انہوں نے بیلٹ اینڈ روڈ منصوبے کے تحت پاکستان میں انفراسٹرکچر اور توانائی کے شعبے میں چینی سرمایہ کاری اور اس حوالے سے پاکستان کو چین سے ملنے والی تیکنیکی اور مالی امداد کا ذکر کیا۔

(جاری ہے)

وزیر خزانہ سینیٹر محمد اورنگزیب نے اپنے انٹرویو کے دوران پاکستان کے زرعی شعبے کی بحالی اور اسے ترقی کا حقیقی انجن بنانے کی کوششوں کا ذکر کیاوزیر خزانہ نے وزیر اعظم پاکستان شہباز شریف کے گذشتہ موسم گرما میں دورہ چین کے دوران شیانگ صوبے کی زرعی جامعات اور عمودی زراعت کے مشاہدہ کا تذکرہ کیا۔

وزیر خزانہ نے کہا کہ وزیر اعظم کی خواہش پر چینی ماہرین کے ہاتھوں تربیت اور مہارت اور ٹیکنالوجی ٹرانسفر کے لیے پاکستان سے عنقریب ایک ہزار طلبا اور ماہرین زراعت چین بھیجے جائیں گے۔وزیر خزانہ سینیٹر محمد اورنگزیب نے پاکستان اور چین کے درمیان قائم دیرپا اور پائیدار طویل مدتی تعلقات اور چین کی جانب سے پاکستان کو ملنے والی امداد کا تذکرہ کیا۔

وزیر خزانہ نے مستقبل کے لیے چینی امداد کی بجائے چینی سرمایہ کاری اور چین سے تیکنیکی مدد کی خواہش کا اظہار کیا۔انہوں نے اس حوالے سے زراعت، اے آئی اور ٹیکنالوجی کے شعبوں کا ذکر کیا جہاں چین کی سرمایہ کاری اور تیکنیکی امداد کی بڑی گنجائش موجود ہے۔وزیر خزانہ نے چین کی جانب سے گرین منصوبوں اور ماحولیاتی استحکام کے شعبوں میں نمایاں پیش قدمی کو دنیا کے مشعل راہ قرار دیا۔وزیر خزانہ نے ان شعبوں میں چین کے تجربات سے مستفید ہونے کی خواہش کا اظہار کیا۔