سعودی عرب ، رمضان المبارک کے دوران صنعتی علاقوں میں کارکنوں کی معاونت کے لئے مہم

جمعہ 28 مارچ 2025 17:02

ریاض(اُردو پوائنٹ اخبارتازہ ترین - این این آئی۔ 28 مارچ2025ء)صنعتی شہرو ں اور ٹیکنالوجی زونز بارے سعودی ادارے (مدن)نے رمضان المبارک کے دوران خیرات مدن کے نام سے مختلف النوع پروگرامز کا آغاز کیا ہے۔ یہ پروگرام صنعتی زونز میں ایثار و یکجہتی کے اظہار کی بہترین مثال پیش کرتے ہیں اور تعاون اورپسند یدگی کے جذبے کے عکاس ہیں۔سعودی خبر رساں ادارے کے مطابق سعودی اتھارٹی فار انڈسٹریل سٹیز اینڈ ٹیکنالوجی زونز (مدن )نے دعوہ گائڈینس اینڈ اویئرنیس ایسوسی ایشن کے تعاون سے ایک لاکھ 36 ہزار روزہ داروں کو افطاری اور کھانے فراہم کئے ۔

افطار و دعوہ منصوبے کے تحت فراہم کر دہ یہ کھانے گرم اور خشک دونوں حالتوں میں تھے۔مختلف صنعتی شہروں میں 28 مقامات پر اس پروگرام میں 35 رضاکار ٹیموں اور 157 افطار ٹیموں نے حصہ لیا۔

(جاری ہے)

مدن نے صنعتی شہروں میں مختلف ممالک سے تعلق رکھنے والے تارکین وطن کارکنوں کے لئے عمرہ کمپینز میں بھی حصہ لیا۔ اس حوالے سے 2256 عمرہ زائرین کو سفری سہولیات کی فراہمی کے لئے 48 بسیں چلائی گئیں۔

اس نے 267 رمضان اجتماعات، 135 آگاہی مہموں اور دعوہ کے 228 مطبوعات کی اشاعت و تقسیم کو سپانسر کیا ۔خیرات مدن مہم مملکت کے انسانی ہمدردی کے تحت سرگرمیوں اور رضاکارانہ خدمات میں صف اول میں رہنے کی کوششوں کا حصہ ہے۔ افطار و دعوہ مہم اور دیگر متعلقہ اقدامات صنعتی شہروں میں مقیم تمام قومیتوں سے تعلق رکھنے والے کارکنوں کے ساتھ بھائی چارے اور تعاون کو بڑھانے میں کردار ادا کرتے ہیں۔