پاکستان فرنیچر کونسل کابیمار اور بند صنعتوں کے لیے پانچ سال کی ٹیکس چھوٹ کا مطالبہ

بدھ 2 اپریل 2025 14:10

لاہور (اُردو پوائنٹ اخبارتازہ ترین - اے پی پی۔ 02 اپریل2025ء) پاکستان فرنیچر کونسل نے حکومت پر زور دیا ہے کہ تمام صوبوں میں بیمار اور بند صنعتوں کی بحالی کے لیے خصوصی مراعاتی پیکج، ٹیکس کی چھوٹ اور آسان قرضے فراہم کیے جائیں۔ بدھ کو یہاں بورڈ آف ڈائریکٹرز کے اجلاس کی صدارت کرتے ہوئے پی ایف سی کے چیف ایگزیکٹو آفیسر میاں کاشف اشفاق نے کہا کہ بیمار اور بند صنعتوں کی بحالی کو نئی صنعتی پالیسی 2025-30 میں ترجیح دی جائے۔

(جاری ہے)

انہوں نے پنجاب اور خیبر پختونخوا حکومتوں کے صنعتی ترقی کے لیے اقدامات کی کو سراہتے ہوئے کہا کہ اس سے ان صوبوں میں ان صنعتی اور تجارتی سرگرمیوں کو فروغ حاصل ہو گا۔ اس موقع پر پی ایف سی کے مشیر ڈاکٹر وقار چوہدری آرائیں نے ایک جامع روڈ میپ کے تحت بیمار اور بند صنعتوں کی بحالی کا مطالبہ کیا اور حکومت پر زور دیا کہ اس کے لیے خصوصی اقتصادی پیکج دیا جائے۔ انہوں نے تجویز دی کہ بیمار اور بند صنعتوں کے لیے پانچ سال کی ٹیکس چھوٹ کا اعلان کیا جائے اور کاروباری برادری کو ان کی بحالی کیلیے آسان شرائط پر قرضے فراہم کیے جائیں۔