دوسرا ون ڈے،نیوزی لینڈ نے پاکستان کو 84 رنز سے شکست دیکر سیریز میں فیصلہ کن برتری حاصل کرلی

3رنز کے ہدف کے تعاقب میں پاکستان کی پوری ٹیم 42ویں اوور میں 208 رنز بنا کر آؤٹ ہوگئی،پاکستان کے سات کھلاڑی ڈبل فگر میں داخل بھی نہ ہوسکے ، آل رائونڈر فہیم اشرف نے 73رنز کی اننگز کھیلی ،نسیم شاہ نے 51رنز بنائے ،نیوزی لینڈ کے مچل مین آف دی میچ قرار پائے

بدھ 2 اپریل 2025 16:40

ہیملٹن (اُردو پوائنٹ اخبارتازہ ترین - این این آئی۔ 02 اپریل2025ء)دوسرے ایک روزہ میچ میں نیوزی لینڈ نے پاکستان کو 84 رنز سے ہرا کر سیریز میں 0-2 کی فیصلہ کن برتری حاصل کرلی، 293رنز کے ہدف کے تعاقب میں پاکستان کی پوری ٹیم 42ویں اوور میں 208 رنز بنا کر آؤٹ ہوگئی،پاکستان کے سات کھلاڑی ڈبل فگر میں داخل بھی نہ ہوسکے ، آل رائونڈر فہیم اشرف نے 73رنز کی اننگز کھیلی ،نسیم شاہ نے 51رنز بنائے ،نیوزی لینڈ کے مچل مین آف دی میچ قرار پائے ۔

ہیملٹن میں کھیلے گئے میچ میں 293 رنز کے ہدف کے تعاقب میں پاکستان نے بدترین آغاز کیا اور محض 32 رنز پر اس کی آدھی ٹیم پویلین لوٹ گئی۔عبداللہ شفیق اور بابراعظم ایک، ایک، امام الحق 3، کپتان محمد رضوان 5 اور سلمان آغاز 9 رنز بنا کر آؤٹ ہوئے۔

(جاری ہے)

جہاں پاکستان کے سات کھلاڑی ڈبل فگر میں داخل بھی نہ ہوسکے وہیں آل راؤنڈر فہیم اشرف نے 73 رنز بنا کر ٹیم کی لاج رکھ لی لیکن ان کی یہ اننگز ٹیم کے کام نہ آسکی۔

حارث رؤف کے 3 رنز پر باؤنسر لگنے سے کنکشن کا شکار ہونے کے بعد ان کی جگہ بلے بازی کرنے والے نسیم شاہ نے بھی دیدہ دلیری سے بلے بازی کی اور پاکستان کو 200 رنز عبور کرنے کرنے میں اہم کردار ادا کرتے ہوئے 51 رنز کی شاندار باری کھیلی۔پاکستان کی پوری ٹیم 42ویں اوور میں 208 رنز بنا کر آؤٹ ہوگئی اور کیوی ٹیم نے مسلسل دوسرا میچ جیت لیا۔مخالف ٹیم کے بین سیئرز نے شاندار باؤلنگ کا مظاہر کرتے ہوئے 5 شکار کیے جبکہ جیکب ڈفی کے حصے میں 3، وِل اورورکے اور نیتھن اسمتھ کے حصے میں ایک، ایک وکٹ آئی۔

اس میچ میں فتح کے ساتھ نیوزی لینڈ نے تین میچوں کی سیریز میں فیصلہ کن برتری حاصل کرلی ہے۔قبل ازیں میزبان نیوزی لینڈ نے دعوت پر پہلے بیٹنگ کرتے ہوئے مقررہ اوورز میں 8 وکٹوں پر 292 رنز بنائے۔کیوی اوپنرز نے ٹیم کو 54 رنز کا آغاز فراہم کیا جس کے بعد وقفے وقفے سے وکٹیں گرتی رہیں، تاہم ساتویں نمبر پر بیٹنگ کے لیے آنے والے مچل ٹیم نے بڑے ہدف کی طرف راہ ہموار کی اور 78 گیندوں پر 99 رنز کی ناقابل شکست اننگز کھیلی۔

ان کے علاوہ پاکستانی نژاد محمد عباس 41 رنز بنا کر دوسرے نمایاں بلے باز رہے۔دیگر بلے بازوں میں ریس ماریو 18، نِک کیلی 31، ہنری نکولس 22، ڈیرل مچل 18، کپتان مائیکل بریس ویل 17، نیتھن اسمتھ 8 اور بین سیئرز 6 رنز بنا کر آؤٹ ہوئے۔پاکستان کے محمد وسیم اور سفیان مقیم نے 2، 2 جبکہ فہیم اشرف، عاکف جاوید اور حارث رؤف نے ایک، ایک کھلاڑی کو آؤٹ کیا۔