بریڈفورڈ میں تمباکو نوشی سے سالانہ 455ملین پائونڈ کا نقصان

بدھ 2 اپریل 2025 21:45

بریڈفورڈ (اُردو پوائنٹ اخبارتازہ ترین - این این آئی۔ 02 اپریل2025ء)بریڈفورڈ میں تمباکو نوشی سے سالانہ 455ملین پانڈ کا نقصان صحت، سماجی بہبود اور معیشت پر سنگین اثرات ڈالنے لگا۔ غیر ملکی میڈیا کے مطابق جاری رپورٹ میں بتایا گیا ہے کہ بریڈ فورڈ کے غریب اور امیر علاقوں میں تمباکو نوشی کی شرح میں نمایاں فرق پایا گیا ہے۔ سٹی وارڈ میں 35 فیصد لوگ سگریٹ پیتے ہیں جبکہ وہارفڈیل میں یہ شرح صرف 6.9 فیصد ہے۔

(جاری ہے)

رپورٹ میں بتایا گیا کہ بریڈفورڈ میں 15 سال سے زائد عمر کے 17 اعشاریہ ایک فیصد افراد تمباکو نوشی کرتے ہیں، جو قومی اوسط سے زیادہ ہے۔ تمباکو نوشی نہ صرف صحت بلکہ مالی مسائل اور غربت میں اضافے کا سبب بھی بنتی ہے۔حاملہ خواتین میں بھی سگریٹ نوشی کی تشویشناک شرح دیکھی گئی، جہاں بعض علاقوں میں یہ 25 فیصد تک پہنچ گئی ہے۔رپورٹ کے مطابق عوامی صحت کے ماہرین نے تمباکو نوشی کے خاتمے کیلئے مزید موثر اقدامات پر زور دیا تاکہ صحت اور معیشت پر اس کے مضر اثرات کو کم کیا جا سکے۔