Live Updates

علی ترین نے احسان اللہ کے مستقبل پر لب کشائی کردی

پیسر نیٹ سیشن کے دوران اچھی بولنگ کررہے، مکمل فٹنس پر واپسی، ڈومیسٹک کرکٹ کا سیزن کھیلیں گے : مالک ملتان سلطانز

ذیشان مہتاب ہفتہ 5 اپریل 2025 14:05

علی ترین نے احسان اللہ کے مستقبل پر لب کشائی کردی

ملتان (اردو پوائنٹ تازہ ترین اخبار۔ 5 اپریل 2025ء) پی ایس ایل فرنچائز ملتان سلطانز کے مالک علی ترین نے فاسٹ بولر احسان اللہ کے مستقبل پر لب کشائی کر دی۔

ملتان سلطانز کے مالک علی ترین نے فاسٹ بولر احسان اللہ کے بارے میں اپ ڈیٹ فراہم کی جس کا مقصد اگلے سال پاکستان سپر لیگ میں واپسی کرنا ہے، پی ایس ایل 2023ء میں احسان اللہ نے شاندار بولنگ کرتے ہوئے 22 وکٹیں حاصل کیں۔

احسان اللہ کو کہنی کی چوٹ سے نقصان پہنچا جو نیوزی لینڈ کے خلاف ہوم گراؤنڈ پر ون ڈے سیریز کے دوران ہوئی اور وہ پی ایس ایل 2024ء سے بھی محروم رہے۔

انجری کی وجہ سے فاسٹ بولر پی ایس ایل 10 کے ڈرافٹ میں فروخت نہیں ہوئے۔ احسان اللہ نے دلبرداشتہ ہوکر کرکٹ سے ریٹائرمنٹ کا اعلان بھی کیا اور چند گھنٹوں کے بعد معافی مانگی اور یہ اعلان واپس بھی لے لیا۔

(جاری ہے)

تاہم حال ہی میں علی ترین نے کہا کہ احسان اللہ نیٹ سیشن میں ملے اور انکشاف کیا کہ ابھرتے ہوئے پیسر ڈومیسٹک کرکٹ کھیل کر واپسی کرنا چاہتے ہیں۔

انہوں نے بتایا کہ احسان اللہ کا پلان ہے کہ وہ پورا ڈومیسٹک سیزن کھیلے اور اگلے سال پی ایس ایل میں واپسی کرے، علی ترین نے کہا کہ نیٹ سیشن کے دوران وہ اچھی بولنگ کررہے ہیں اور مکمل فٹنس پر واپس جائیں گے اور ڈومیسٹک کرکٹ کا سیزن کھیلیں گے۔

واضح رہے کہ علی ترین نے رواں سال کے شروع میں کہا تھا کہ وہ کہنی کی چوٹ کی وجہ سے 150 کلو میٹر فی گھنٹہ کی رفتار سے بولنگ نہیں کرپائیں گے۔