محکمہ لائیو سٹاک کا شدید گرمی کے باعث پولٹری فارمرز کو شیڈز میں تازہ پانی کا مناسب انتظا م رکھنے کا مشورہ

منگل 8 اپریل 2025 18:58

سیالکوٹ (اُردو پوائنٹ اخبارتازہ ترین - اے پی پی۔ 08 اپریل2025ء) ڈپٹی ڈائریکٹر محکمہ لائیو سٹاک وڈیری ڈویلپمنٹ سیالکوٹ ڈاکٹر تنویر احمد نےکہا ہے کہ پولٹری فارمنگ میں پانی انتہائی اہمیت کا حامل ہے کیونکہ شدید گرم موسم میں پانی کی کمی چوزوں کی شرح اموات میں اضافہ، نشو و نما اور پیداوار میں کمی کا باعث بن سکتی ہے اسلئے پولٹری فارمرز اور مرغی پال حضرات موسم گرما کے دوران شیڈز میں تاز ہ پانی کا مناسب انتظام رکھیں تاکہ برائلر مرغی کی افزائش نسل میں کسی مشکل کا سامنا نہ کرنا پڑے۔

انہوں نے اے پی پی کو بتایا کہ خوراک اور پانی دونوں پولٹری فارمنگ کیلئے بے حد اہم ہیں لیکن پانی کی اہمیت خوراک سے بھی کہیں زیادہ ہے کیونکہ خوراک کے بغیر مرغی ایک سے 2ہفتے تک زندہ رہ سکتی ہے لیکن پانی کی کمی کے بغیرمرغی چند گھنٹے بھی نہیں گزار سکتی۔

(جاری ہے)

انہوں نے بتایاکہ مرغی کا جسم 60 فیصد پانی پر مشتمل ہوتاہے جبکہ چوزوں کا جسم 80 فیصد پانی کا حامل ہوتاہے۔

انہوں نے کہاکہ اگر مرغیوں میں چربی 98فیصد اور لحمیات 50 فیصد تک بھی ضائع ہو جائیں تو مرغی زندہ رہ سکتی ہے لیکن اگر پانی کی مقدار 10فیصد بھی کم ہو جائے تو نمکیات کا تناسب بگڑنے سے اس کی موت واقع ہو جاتی ہے۔ انہوں نے بتایا کہ پولٹری فارمرز کی اکثریت پانی کی اہمیت سے ناواقف ہے اور وہ صرف خوراک و دیگر ضروریات کو اہمیت دیتے ہیں جبکہ پانی کی آسانی سے دستیابی کے باعث اسے نظر انداز کردیا جاتاہے لیکن وہ یہ نہیں جانتے کہ موسم گرما میں پانی کی کمی چوزوں کی شرح اموات میں اضافہ کا موجب بننے کے ساتھ ساتھ ان کی نشو و نما اور پیداوار پر بھی بری طرح اثر انداز ہوتی ہے۔

انہوں نے بتایاکہ پانی کی اچھی کوالٹی سے چوزوں کی نشوونما میں بہتری دیکھنے میں آئی ہے۔انہوں نے مرغبانی کرنے والوں کو ہدایت کی کہ وہ پانی کی اہمیت کو مد نظر رکھیں تاکہ پولٹری فارمنگ کے بہتر نتائج حاصل ہو سکیں۔