ایس ای سی پی نے عوام کو غیر قانونی آف شور ٹریڈنگ اور انویسٹمنٹ پلیٹ فارمز کے خلاف خبردار کیا

کراچی (اُردو پوائنٹ اخبارتازہ ترین - این این آئی۔ 09 اپریل2025ء)ایس ای سی پی نے عوام کو خبردار کیا ہے کہ غیر مجاز آن لائن ٹریڈنگ اور سرمایہ کاری پلیٹ فارمز کی تعداد میں تیزی سے اضافہ ہو رہا ہے، جو سرمایہ کاروں کو تیزی سے منافع کے جھوٹے وعدوں کے ذریعے راغب کرتے ہیں۔ یہ پلیٹ فارمز غیر قانونی طور پر پاکستان میں ریگولیٹری منظوری کے بغیر فارن ایکسچینج (فاریکس)، سیکیورٹیز، کموڈٹیز، آپشنز اور دیگر قیاسی مالیاتی آلات کی ٹریڈنگ کی سہولت فراہم کرتے ہیں۔

یہ ادارے، جو عموما بیرونِ ملک قائم ہوتے ہیں، پاکستان کے کسی بھی ریگولیٹری ادارے سے لائسنس یا نگرانی کے بغیر کام کر رہے ہیں۔ ایسے پلیٹ فارمز کے ساتھ سرمایہ کاری کرنے والے افراد کو سنگین خطرات کا سامنا ہوتا ہے، جن میں دھوکہ دہی، رقوم کی خوردبرد، اور مکمل سرمایہ ضائع ہونے جیسے نقصانات شامل ہیںاور ان کے پاس قانونی تحفظ یا رقم کی واپسی کا کوئی راستہ موجود نہیں ہوتا۔

(جاری ہے)

ایسا ہی ایک غیر مجاز پلیٹ فارم جو اس وقت پاکستانی سرمایہ کاروں کو نشانہ بنا رہا ہے، " Qxbroker (Quotex)" ہے، جس تک اس کی ویب سائٹ https://qxbroker.com/en/ اور گوگل پلے اسٹور پر دستیاب موبائل ایپلیکیشن کے ذریعے رسائی حاصل کی جا سکتی ہے۔ایس ای سی پی نے واضح طور پر بیان کیا ہے کہ "Quotex" کو پاکستان میں کام کرنے کی اجازت نہیں ہے اور اسے متعدد بین الاقوامی ریگولیٹرز کی جانب سے غیر مجاز سرگرمیوں پر نشاندہی کی جا چکی ہے۔

یہ معاملہ فوری کارروائی کے لیے وفاقی تحقیقاتی ادارے (FIA)، پاکستان ٹیلی کمیونیکیشن اتھارٹی (PTA)، اور گوگل کو بھیجا گیا ہے، تاکہ اس پلیٹ فارم تک پاکستان میں رسائی کو بلاک کیا جا سکے۔ایس ای سی پی عوام کو پرزور مشورہ دیتا ہے کہ وہ "Quotex" یا اس جیسے دیگر غیر رجسٹرڈ پلیٹ فارمز پر اکانٹ نہ کھولیں، رقم جمع نہ کروائیں، اور نہ ہی اپنی کوئی ذاتی یا مالی معلومات شیئر کریں۔

سرمایہ کاروں کو خاص طور پر اس وقت انتہائی احتیاط برتنے کی ضرورت ہے جب انہیں بغیر مانگے سرمایہ کاری کی پیشکش کی جائے، خاص طور پر ایسی پیشکشیں جو سوشل میڈیا، واٹس ایپ گروپس یا سوشل میڈیا انفلوئنسرز کے ذریعے کی جا رہی ہوں۔کسی بھی سرمایہ کاری سروس سے وابستہ ہونے سے قبل، افراد کو لازم ہے کہ وہ متعلقہ ادارے کی ریگولیٹری حیثیت کی تصدیق ایس ای سی پی کی آفیشل ویب سائٹ www.secp.gov.pk پر کریں، جہاں منظور شدہ بروکرز اور لائسنس یافتہ سرمایہ کاری مشیروں کی مکمل فہرست دستیاب ہے۔