ڈی سی لاہورکی زیر صدارت اجلاس، انسداد ڈینگی کے حوالے سے موثر اقدامات کی ہدایت

جمعہ 11 اپریل 2025 13:40

لاہور (اُردو پوائنٹ اخبارتازہ ترین - اے پی پی۔ 11 اپریل2025ء) لاہور میں انسدادِ ڈینگی مہم کو موثر اور فعال بنانے کے لیے ڈپٹی کمشنر سید موسٰی رضا کی زیر صدارت اہم اجلاس منعقد ہوا جس میں ایڈیشنل ڈپٹی کمشنر ہیڈ کوارٹر جعفر چودھری، سی او ہیلتھ ڈاکٹر ذوہیب سمیت تمام متعلقہ محکموں کے افسران نے شرکت کی۔اجلاس میں سی او ہیلتھ کی جانب سے ڈینگی سے بچائو کی تیاریوں اور جاری سرگرمیوں پر تفصیلی بریفنگ دی گئی۔

بتایا گیا کہ ضلعی انتظامیہ 2024 کی طرز پر اس سال بھی ڈینگی لاروا کو کنٹرول کرنے کے لیے مکمل طور پر متحرک ہے۔ڈی سی نے کہا کہ خوش آئند بات یہ ہے کہ گزشتہ سال شہر میں ڈینگی کا کوئی بڑا کیس رپورٹ نہیں ہوا اور رواں برس بھی موثر حکمت عملی کے تحت بھرپور آپریشنز کیے جائیں گے۔

(جاری ہے)

انہوں نے ہدایت کی کہ تمام انتظامی افسران انسدادِ ڈینگی کے لیے روزانہ کی بنیاد پر اجلاس منعقد کریں اور لاروا کے تدارک کے لیے تمام ضروری اقدامات فوری طور پر اٹھائے جائیں۔

انہوں نے کہا کہ ڈینگی لاروا کو چھپانے کے بجائے اس کی برآمدگی یقینی بنائی جائے اور اس ضمن میں کوئی غفلت برداشت نہیں کی جائے گی،انسدادِ ڈینگی کے لیے تشکیل کردہ ٹیموں کی موثر مانیٹرنگ کرنے اور ٹیموں کو دلجمعی اور جانفشانی سے کام کرنے کی بھی ہدایت بھی کی گئی۔ڈی سی نے کہا کہ ڈینگی لاروا کی چیکنگ مرحلہ وار کی جائے گی جبکہ انسدادِ ڈینگی مہم کو کامیاب بنانے کے لیے تمام محکمے مربوط انداز میں کام جاری رکھیں ۔انہوں نے یقین دہانی کرائی کہ ضلعی انتظامیہ لاہور انسداد ڈینگی مہم کو کامیاب بنانے کے لیے پوری طرح متحرک اور سنجیدہ ہے۔