وزیر اعظم کی ہدایت، ایران و عراق جانے والے زائرین کے ایشوز کے حل کیلئے قائم خصوصی ٹاسک فورس کا اہم اجلاس

اسلام آباد(اُردو پوائنٹ اخبارتازہ ترین - آن لائن۔ 04 جولائی2025ء) وزیر اعظم کی ہدایت پر ایران و عراق جانے والے زائرین کے ایشوز کے حل کیلئے قائم خصوصی ٹاسک فورس کا اہم اجلاس،چئیرمین ٹاسک فورس وفاقی وزیرداخلہ محسن نقوی۔ وفاقی وزیر مذہبی امور سردار محمد یوسف، وفاقی وزیر سمندر پار پاکستانیز چوہدری سالک حسین اور وزیر مملکت داخلہ طلال چوہدری کی اجلاس میں شرکت کی ، ٹاسک فورس کے اجلاس میں زائرین کی سہولت و سکیورٹی کے لیے اہم فیصلے کئے گئے ۔

اجلاس کو سول ایوی ایشن کی جانب سے بریفنگ میں بتایا گیا کہ ایران کیلئے ہفتہ وار پروازوں کی تعداد 6 سے بڑھا کر 15 کر دی گئی۔اربعین پر عراق کے لئے 107 خصوصی پروازوں کا انتظام کیا گیا ہے ایران اور عراق جانے والے زائرین کے لیے پروازوں کی تعداد مزید بڑھانے پر غور ہے ۔

(جاری ہے)

بریفنگ میں کہا گیا کہ مستقبل میں زائرین کو مزید بہتر سفری سہولتوں کی فراہمی کے لیے فیری سروس کا بھی آغاز کیا جا رہا ہے۔

اجلاس میں اس بات پر اتفاق کیا گیا کہ عاشورہ کے بعد اربعین کے لئے سکیورٹی صورتحال کا از سر نو جائزہ لے کر زائرین کے زمینی راستے سے سفر سے متعلق فیصلہ کیا جائیگا۔۔ وزیر داخلہ محسن نقوی کا کہنا تھا کہ موجودہ صورتحال کے پیش نظر زائرین کو کسی بھی قسم کی مشکل یا پریشانی سے محفوظ رکھنا ترجیح ہے زائرین کی حفاظت سب سے زیادہ عزیز ہے اگلے سال یکم جنوری سے زائرین گروپ آرگنائزرز کا نیا سسٹم لاگو ہو گا جبکہ سالار سسٹم کو مکمل طور منقطع کر دیا جائے گا۔

اجلاس میں یہ بھی فیصلہ کیا گیا کہ یکم جنوری 2026 سے زائرین صرف گروپ آرگنائزرز سسٹم کے تحت زیارات کیلئے جا سکیں گے۔ وزیر داخلہ نے ایف آئی اے اور متعلقہ ادارے زائرین کی آڑ میں عراق جانے والے غیر قانونی افراد کو روکنے کے لیے ہر ممکن اقدامات کو یقینی بنانے کی ہدایت کی ۔بریفنگ میں مزید کہا گیا کہ زائرین گروپ آرگنائزرز کے رجسٹریشن کے لیے اب تک 1413 درخواستیں موصول ہوئی ہیں درخواستوں کی جانچ پڑتال اور سکروٹنی کا عمل جاری ہے۔

اجلاس میں سیکرٹری داخلہ۔ سیکرٹری مذہبی امور، وزارتِ اطلاعات اور وزارتِ خارجہ کے نمائندوں نے شرکت کی ڈی جی ایف آئی اے، ڈی جی سول ایوی ایشن، ایڈیشنل چیف سیکرٹری بلوچستان، آئی جی بلوچستان، کمشنر کوئٹہ اور متعلقہ اداروں کے افسران نے بذریعہ زوم اجلاس میں شرکت کی۔