کاشتکاروں کو سورج مکھی کی بہاریہ فصل کی پہلی آبپاشی روئیدگی کے20 دن بعداور دوسری آبپاشی پہلے پانی کے 20 دن بعد کرنے کی ہدایت

پیر 14 اپریل 2025 17:03

فیصل ۱ٓباد (اُردو پوائنٹ اخبارتازہ ترین - اے پی پی۔ 14 اپریل2025ء) محکمہ زراعت نے کاشتکاروں کو سورج مکھی کی بہاریہ فصل کی پہلی آبپاشی روئیدگی کے20 دن بعداور دوسری آبپاشی پہلے پانی کے 20 دن بعد کرنے کی ہدایت کی ہے اور کہا ہے کہ فصل کی آبپاشی کا سارا دارومدار موسمی حالات پر ہوتا ہے جبکہ زیادہ گرم وخشک موسمی حالات میں فصل کو زیادہ پانی اور مرطوب موسمی حالات میں کم آبپاشی کی ضرورت ہوتی ہے۔

نظامت زرعی اطلاعات محکمہ زراعت کے مطابق سورج مکھی کی بہتر پرورش کیلئے پانی کی اہمیت سے انکارممکن نہیں کیونکہ جڑوں کے ذریعے پودوں کو مطلوب خوراک کے اجزا پانی میں حل ہو کر ہی پودے تک پہنچتے ہیں نیز ضیائی تالیف کے عمل میں بھی اس کاکردار انتہائی اہم ہے۔انہوں نے کہا کہ سورج مکھی کم پانی میں پروان چڑھنے کی صلاحیت رکھنے والی فصل ہے جس کے باعث کاشتکار اکثر اس کی آبپاشی پر پوری توجہ نہیں دیتے جس کی وجہ سے پیداوار میں مسلسل کمی واقع ہو رہی ہے۔

(جاری ہے)

انہوں نے کہاکہ سورج مکھی کی فصل کو پہلا پانی بیج پھوٹنے کے 20د ن بعد، دوسرا پانی پہلے پانی کے20دن بعد، تیسرا پانی پھولوں کی ڈوڈیاں بنتے وقت اور چوتھاپانی بیج بننے کے مرحلے پر لگانا ضروری ہے جو پھول بننے کے 10سے15 روز بعد شروع ہوتاہے۔ انہوں نے بتایاکہ آخری مرحلے میں پانی کی کمی کی وجہ سے بیج پیچک کر کمزور اور پتلا رہ جاتاہے جس کے نتیجہ میں پیداوار میں کمی ہو جاتی ہے۔انہوں نے کہاکہ اگر متواتر خشک اور گرم موسم کی صورتحال ہو تو چوتھے پانی کے 15روز بعد ایک مرتبہ اور پانی بھی دے دینا چاہیے۔انہوں نے کہاکہ ماہرین زراعت کی مشاورت اور موسمی حالات کے پیش نظر آبپاشی کے وقفہ میں کمی بیشی بھی کی جاسکتی ہے۔