Live Updates

پی ایس ایل ، شاہین آفریدی 73 اننگز کے بعد سب سے زیادہ وکٹیں لینے والے باولر بن گئے

25 سالہ پیسر اب تک لیگ میں 21.04 کی اوسط سے 105 وکٹیں حاصل کرچکے ہیں

ذیشان مہتاب پیر 14 اپریل 2025 16:16

پی ایس ایل ، شاہین آفریدی 73 اننگز کے بعد سب سے زیادہ وکٹیں لینے والے ..

لاہور (اردو پوائنٹ تازہ ترین اخبار ۔ 14 اپریل 2025ء ) لاہور قلندرز کے کپتان شاہین آفریدی 73 اننگز کے بعد پی ایس ایل میں سب سے زیادہ وکٹیں لینے والے باولر بن گئے ہیں۔

اتوار کو پنڈی کرکٹ اسٹیڈیم میں کھیلے گئے میچ میں لاہور قلندرز کے 220 رنز کے ہدف کے جواب میں کوئٹہ کی ٹیم 17 ویں اوور میں 140 رنز پر ڈھیر ہوگئی، یوں پی ایس ایل 10 کے چوتھے میچ میں لاہور قلندرز نے کوئٹہ گلیڈی ایٹرز کو 79 رنز سے شکست دی۔

شاہین آفریدی نے میچ میں محض 6 رنز کے عوض 2 وکٹیں حاصل کیں۔ وہ اب تک پی ایس ایل میں 73 مقابلوں میں 21.04 کی اوسط سے 105 وکٹیں حاصل کرچکے ہیں جو اتنی اننگز کے بعد کسی بھی باولر کی سب سے زیادہ وکٹیں ہیں۔

اس فہرست میں وہاب ریاض 99 وکٹوں کے ساتھ دوسرے، حسن علی 97 وکٹیں لیکر تیسرے، شاداب خان 79 وکٹیں لیکر چوتھے جبکہ محمد عامر 71 وکٹوں کے ساتھ پانچویں نمبر پر ہیں۔

(جاری ہے)

اس کے علاوہ شاہین آفریدی اب پی ایس ایل کی تاریخ میں میں پہلے اوور اور پاور پلے میں سب سے زیادہ وکٹیں اپنے نام کرچکے ہیں۔

25 سالہ پیسر نے پی ایس ایل کی تاریخ میں اب تک پہلے اوور میں 20 وکٹیں لی ہیں، محمد عامر 13 وکٹوں کے ساتھ اس فہرست میں دوسرے، حسن علی 12 وکٹیں لیکر تیسرے جب کہ عماد وسیم 10 وکٹوں کے ساتھ چوتھے نمبر پر ہیں۔

شاہین آفریدی پی ایس ایل میں پاور پلے میں سب سے زیادہ وکٹیں لینے والے باولر بھی ہیں ۔ وہ اب تک پاور پلے میں 780 گیندوں میں 35 وکٹیں حاصل کرچکے ہیں ۔ حسن علی 492 گیندوں مپں 22 وکٹیں لیکر دوسرے، محمد عامر 612 اور سمت پٹیل 289 گیندوں پر 18،18 وکٹوں کے ساتھ مشترکہ طور پر تیسرے، محمد عرفان 450 بالز میں 17 وکٹیں لیکر چوتھے نمبر پر ہیں۔