سابقہ اہلیہ کی مالی حالت پرسشمیتا سین کے بھائی کا ردعمل سامنے آگیا

سابقہ اہلیہ بیٹی کو ان سے دورکرنے کی کوشش کر رہی ہے، واجیو سین

پیر 14 اپریل 2025 22:05

سابقہ اہلیہ کی مالی حالت پرسشمیتا سین کے بھائی کا ردعمل سامنے آگیا

ممبئی (اُردو پوائنٹ اخبارتازہ ترین - آن لائن۔ 14 اپریل2025ء)بھارتی اداکارہ سشمیتا سین کے بھائی راجیو سین نے سابقہ اہلیہ چارو اسوپا کے مالی حالات اور بیٹی زیانا سے دوری پر ردعمل دے دیا۔ٹی وی اداکارہ اور راجیو سین کی سابقہ اہلیہ چارو اسوپا مالی پریشانیوں کے باعث ممبئی چھوڑ کر اپنی بیٹی زیانا کے ساتھ بیانیر (راجستھان) منتقل ہو گئی ہیں۔ وہ اس وقت آن لائن کپڑوں کا کاروبار کر رہی ہیں جس کی ویڈیوز سوشل میڈیا پر وائرل ہو رہی ہیں۔

راجیو سین نے حال ہی میں اپنی سابقہ اہلیہ چارو اسوپا کی مالی مشکلات اور بیٹی زیانا سے دوری کے حوالے سے ردعمل دیتے ہوئے کہا ہے کہ ان کی سابقہ اہلیہ بیٹی کو ان سے دور کرنے کی کوشش کر رہی ہے۔راجیو کا کہنا ہے جنوری کے بعد سے وہ زیانا سے نہیں مل سکے۔

(جاری ہے)

انہوں نے دعوی کیا کہ جب انہوں نے بیانیر آ کر بیٹی سے ملنے کی کوشش کی تو انہیں کوئی جواب نہیں ملا۔

راجیف نے چارو کے مالی مسائل پر جواب دیتے ہوئے یہ دعوی بھی کیا کہ وہ حال ہی میں کروز ٹرپ اور نئی جائیداد کی خریداری جیسی سرگرمیوں میں مصروف رہ چکی ہے۔انہوں نے کہا کہ وہ چارو کی کوششوں کی قدر کرتے ہیں مگر میڈیا کے سامنے ذاتی معاملات لانا درست نہیں۔ راجیف نے زیانا کی پرورش کو اولین ترجیح قرار دیا اور کہا کہ وہ اب بھی چاہتے ہیں کہ بیٹی ایک مستحکم ماحول میں پرورش پائے۔یاد رہے کہ چارو کی آن لائن کپڑے بیچنے کی ویڈیوز سامنے آنے کے بعد اداکارہ سشمیتا سین اور ان کے بھائی کو سوشل میڈیا صارفین کی جانب سے تنقید کا نشانہ بنایا گیا تھا۔