خیبرپختونخواہ کے مخصوص اضلاع میں بھنگ کی کاشت کو قانونی حیثیت دینے کا فیصلہ

بھنگ کی کاشت کیلئے باقاعدہ لائسنس جاری کیے جائیں گے، مختلف شعبوں کے لیے لائسنس فیس الگ ہوگی، اس حوالے سے ریگولیٹری اتھارٹی قائم کی جائے گی

ساجد علی منگل 15 اپریل 2025 15:06

پشاور ( اُردو پوائنٹ اخبارتازہ ترین۔ 15 اپریل 2025ء ) صوبہ خیبر پختونخواہ کے مخصوص اضلاع میں بھنگ کی کاشت کو قانونی حیثیت دینے کا فیصلہ کرلیا گیا۔ تفصیلات کے مطابق پاکستان تحریک انصاف کی خیبر پختونخواہ حکومت نے صوبے کے مخصوص اضلاع میں بھنگ کی کاشت کو قانونی حیثیت دینے کا فیصلہ کیا ہے، جو بھنگ کے باقاعدہ صنعتی اور طبی استعمال کی جانب ایک اہم قدم ہے، اس اقدام کے تحت صرف لائسنس یافتہ کاشتکاروں کو کاشت کی اجازت دی جائے گی اور سخت مانیٹرنگ فریم ورک قائم کیا جائے گا۔

بتایا گیا ہے کہ پہلے مرحلے میں مخصوص اضلاع میں بھنگ کاشت کی جائے گی اور اس کے لیے باقاعدہ لائسنس جاری کیے جائیں گے، مختلف شعبوں کے لیے لائسنس فیس الگ ہوگی، لائسنس کے اجراء کے لیے زراعت، صحت، ایکسائز، نارکاٹیکس اور دیگر متعلقہ محکموں پر مشتمل کمیٹی تشکیل دی جائے گی، حکومت نے ایک ریگولیٹری اتھارٹی کے قیام کی منظوری بھی دے دی ہے جو بھنگ سے متعلق تمام امور کو ریگولیٹ کرے گی۔

(جاری ہے)

اس حوالے سے صوبائی وزیر زراعت سجاد برکوال نے بتایا کہ اس شعبے کو ریگولیٹ کیا جا رہا ہے، ابتدائی مرحلے میں بھنگ کی کاشت مخصوص علاقوں تک محدود رہے گی، صرف لائسنس یافتہ افراد ہی کاشت کر سکیں گے، کاشت کاری، پیداوار، نقل و حمل اور استعمال کے تمام پہلوؤں کی نگرانی کے لیے ریگولیٹری اتھارٹی تشکیل دی جائے گی، اتھارٹی قانون کی تعمیل کو یقینی بنائے گی اور غلط استعمال کی روک تھام کرے گی۔

انہوں نے مزید کہا کہ لائسنسنگ کے عمل کی نگرانی کے لیے ایک کثیر محکمانہ کمیٹی بھی قائم کی جائے گی، اس کمیٹی میں زراعت، صحت، ایکسائز اور انسداد منشیات کے محکموں کے نمائندے شامل ہوں گے، صوبائی حکومت نے پہلے ہی اس نئی پالیسی کی حمایت کے لیے باضابطہ قواعد و ضوابط کی منظوری دے دی ہے، بھنگ کی کاشت سے صوبے میں اناج کی پیداوار متاثر نہیں ہوگی اور نئی پالیسی سے معاشی سرگرمیوں کو فروغ ملنے کی توقع ہے۔