امریکی امداد کی بندش سے جنسی و تولیدی صحت کی خدمات کو خطرہ

اسلام آباد (اُردو پوائنٹ ۔ UN اردو۔ 10 مئی 2025ء) جنسی و تولیدی صحت کے لیے اقوام متحدہ کے ادارے (یو این ایف پی اے) نے کہا ہے کہ امریکہ کی جانب سے ادارے کو دیے جانے والے امدادی وسائل روکنے کے فیصلے سے دنیا بھر میں خواتین اور لڑکیوں کو ضروری طبی خدمات کی فراہمی بری طرح متاثر ہو گی۔

ایک بیان میں ادارے نے واضح کیا ہے کہ امریکہ نے یہ فیصلہ 1985 کی کیمپ۔

کیمپ۔

(جاری ہے)

ادارے کے مالی وسائل روکے جانے کا فیصلہ نافذ العمل ہو چکا ہے جبکہ 40 سے زیادہ موجودہ امدادی منصوبوں کے لیے امداد بند کرنے کے نوٹس پہلے ہی جاری ہو چکے ہیں جنہیں امریکہ سے تقریباً 335 ملین ڈالر ملتے تھے۔

خواتین اور لڑکیوں کی صحت کو خطرہ

'یو این ایف پی اے' نے کہا ہے کہ امریکہ اس کا بنیادی اور طویل مدتی شراکت دار ہے جس نے کئی دہائیوں تک صحت کے عالمگیر نظام مضبوط بنانے اور بے شمار زندگیوں کو بچانے میں مدد دی ہے۔

گزشتہ چار سال میں ہی امریکی حکومت کی مہیا کردہ امداد سے ادارے نے 17 ہزار سے زیادہ ماؤں کو زچگی میں تحفظ دیا، 90 لاکھ ان چاہے حمل روکنے میں مدد دی اور خاندانی منصوبہ بندی کی خدمات تک رسائی کو بڑھا کر تقریباً 30 لاکھ غیرمحفوظ اسقاط حمل روکے۔

ادارے کا کہنا ہے کہ امریکہ کی جانب سے امدادی وسائل روکے جانے سے خاص طور پر مسلح تنازعات اور بحرانوں سے متاثرہ علاقوں میں زچگی کی اموات کو روکنے کی کوششیں متاثر ہوں گی۔ وسائل کی عدم دستیابی کے باعث بحرانوں کا شکار لاکھوں لوگ ضروری مدد سے محروم ہو جائیں گے۔ علاوہ ازیں، اس فیصلے سے دنیا بھر میں دائیوں (مڈوائف) کی تربیت اور انہیں ضروری وسائل کی فراہمی بھی متاثر ہو گی جن کا بالخصوص بحران زدہ علاقوں میں زچگی کے دوران ماؤں کی اموات کو روکنے میں اہم کردار ہے۔

فیصلے پر نظرثانی کا مطالبہ

'یو این ایف پی اے' نے امریکہ پر زور دیا ہے کہ وہ اپنے اس فیصلے پر نظرثانی کرے اور عالمگیر صحت عامہ کے لیے رہنما کردار ادا کرتے ہوئے لاکھوں زندگیوں کو تحفظ دینے میں اپنا کردار نبھائے۔ جنسی و تولیدی صحت کے لیے مخصوص اقوام متحدہ کے واحد ادارے کو مالی وسائل فراہم کرنا دنیا بھر میں خواتین اور لڑکیوں اور نومولود بچوں کی صحت کو تحفظ دینے کا یقینی طریقہ ہے۔

ادارے نے اس معاملے میں اپنے ایگزیکٹو بورڈ کے ذریعے امریکہ کی حکومت کے ساتھ بات چیت چاری رکھنے کے عزم کا اظہار کیا ہے جس کا امریکہ بھی پانچ دہائیوں سے فعال رکن رہا ہے۔ ادارے نے دنیا بھر میں خواتین اور لڑکیوں کی صحت، تحفظ اور وقار کو برقرار رکھنے کے لیے اپنی ذمہ داریاں انجام دیتے رہنے کا عزم بھی کیا ہے۔