چیٹ جی پی ٹی سب سے زیادہ ڈائون لوڈ کی جانے والی ایپس میں سرفہرست

چیٹ جی پی ٹی نے مارچ کے مہینے میں ایپ اسٹور ، گوگل پلے پر مجموعی طور پر 4 کروڑ 60 لاکھ نئی انسٹالز حاصل کیں

جمعرات 17 اپریل 2025 23:04

چیٹ جی پی ٹی سب سے زیادہ ڈائون لوڈ کی جانے والی ایپس میں سرفہرست

لاہور(اُردو پوائنٹ اخبارتازہ ترین - این این آئی۔ 17 اپریل2025ء)چیٹ جی پی ٹی دنیا کی سب سے زیادہ ڈائون لوڈ کی جانے والی ایپ بن گئی۔ایپ انٹیلی جنس فرم ایپ فیگرز کے مطابق مارچ میں چیٹ جی پی ٹی دنیا کی سب سے زیادہ ڈائون لوڈ کی جانے والی ایپ بن گئی اور پہلی مرتبہ اس نے انسٹاگرام اور ٹک ٹاک کو بھی پیچھے چھوڑ دیا۔چیٹ جی پی ٹی نے مارچ کے مہینے میں ایپ اسٹور اور گوگل پلے پر مجموعی طور پر 4 کروڑ 60 لاکھ نئی انسٹالز حاصل کیں، جو فروری کے مقابلے میں 28 فیصد زیادہ ہے، 2025 کی پہلی سہ ماہی میں چیٹ جی پی ٹی نے گزشتہ برس کی اسی مدت کے مقابلے میں 148 فیصد اضافہ ریکارڈ کیا ہے۔

انسٹاگرام نے بھی اندازاً 4 کروڑ 60 لاکھ ڈائون لوڈز حاصل کیں تاہم یہ تعداد معمولی فرق سے چیٹ جی پی ٹی سے کم رہی۔

(جاری ہے)

ٹک ٹاک فروری میں پہلے نمبر پر تھی، مارچ میں تیسرے نمبر پر چلی گئی جس کے 4 کروڑ 50 لاکھ ڈائون لوڈز ہوئے، فیس بک اور واٹس ایپ نے بالترتیب چوتھی اور پانچویں پوزیشن حاصل کی۔ایپ فیگرز کا کہنا ہے کہ چیٹ جی پی ٹی کی تیزی سے بڑھتی ہوئی مقبولیت کو دیکھتے ہوئے یہ ممکن ہے کہ یہ درجہ بندی آئندہ مہینوں میں بھی برقرار رہے۔

مارچ کے مہینے میں دنیا بھر میں سب سے زیادہ ڈائون لوڈ ہونے والی 10 ایپس کے مجموعی انسٹالز 33 کروڑ 90 لاکھ رہے، جو فروری کے 29 کروڑ 90 لاکھ کے مقابلے میں واضح اضافہ ہے۔ٹیکنالوجی ویب سائٹ ٹیک کرنچ کے مطابق چیٹ جی پی ٹی کی یہ کامیابی کئی نئی اپڈیٹس کے ساتھ سامنے آئی ہے، مارچ میں اس کی امیج جنریشن کی صلاحیت میں 1 سال بعد پہلی بار بڑی اپڈیٹ آئی، جس کی وجہ سے صارفین میں اسٹوڈیو گھبلی طرز کی تصاویر اور میمز بنانے کا ایک نیا رجحان مقبول ہوا۔