پاکستان میں رواں ہفتے گرمی کا عالمی ریکارڈ بننے کا خدشہ

لاہور (اُردو پوائنٹ اخبارتازہ ترین۔ 30 اپریل2025ء) پاکستان میں رواں ہفتے گرمی کا عالمی ریکارڈ بننے کا خدشہ، رواں ہفتے جنوبی ایشیا میں گرمی 50 ڈگری کے عالمی ریکارڈ کو چھو جانے کا امکان۔ تفصیلات کے مطابق موسمیاتی تبدیلیوں کے خوفناک نتائج کا سامنا کرنے والے پاکستان کیلئے ایک اور تشویش ناک خبر سامنے آئی ہے۔ میڈیا رپورٹس کے مطابق امریکی اخبارواشنگٹن پوسٹ کی ایک رپورٹ کے مطابق پاکستان میں رواں ہفتے گرمی کا عالمی ریکارڈ بن سکتا ہے، پاکستان کے وسطی اور جنوبی علاقوں میں درجہ حرارت 50 ڈگری تک جا سکتا ہے۔

اس سے پہلے پاکستان کے شہر نواب شاہ میں 2018 کے اپریل میں پارہ 50 ڈگری تک گیا تھا جو ایشیا بھر میں گرمی کا ریکارڈ تھا۔ تاہم اب یہ ریکارڈ بھی ٹوٹنے کا امکان ہے۔ دوسری جانب محکمہ موسمیات کاکہنا ہے مغربی ہواوں کا ایک سلسلہ آج سے ملک میں داخل ہوگا،یکم مئی سے شمال مشرقی پنجاب میں مرطوب ہوائیں بھی داخل ہو سکتی ہیں، آج شام یا رات سے 4 مئی تک کشمیر، اسلام آباد،راولپنڈی، مری، گلیات، اٹک، چکوال، جہلم، میں آندھی گرج چمک کے ساتھ بارش کی توقع ہے ،منڈی بہاؤالدین، گجرات، گوجرانوالہ، حافظ آباد، سیالکوٹ، نارووال، میں آندھی گرج چمک کے ساتھ بارش کی توقع ہے۔

(جاری ہے)

رپورٹ کے مطابق لاہور، ساہیوال، قصور، اوکاڑہ، فیصل آباد، ٹوبہ ٹیک سنگھ، میں آندھی گرج چمک کے ساتھ بارش کی توقع ہے ،جھنگ، خوشاب، سرگودھا، میانوالی،میں آندھی گرج چمک کے ساتھ بارش کا امکان ہے۔ ادھرخیبرپختونخوا کے اضلاع چترال، دیر، سوات، ایبٹ آباد، مانسہرہ، ہری پور، کوہستان، شانگلہ میں آندھی ،گرج چمک کے ساتھ بارش ہو سکتی ہے،بونیر، ملاکنڈ، وزیرستان، کوہاٹ، لکی مروت، باجوڑ، مہمند، کرک،خیبر، پشاور، مردان، کرم، گلگت بلتستان میں آندھی اور گرج چمک کے ساتھ بارش کی توقع ہے ،کہیں کہیں ژالہ باری اور موسلا دھار بارش کا امکان ہے۔

رپورٹ کے مطابق 2 مئی رات سے 5 مئی کے دوران ملتان، ڈیرہ غازی خان، بہاولپور، بہاولنگر، میں گرد آلود آندھی اور گرج چمک کے ساتھ بارش کا امکان ہے۔ ادھر سندھ کے اضلاع سکھر، میرپورخاص، خیرپور، تھرپارکر، سانگھڑ، عمرکوٹ میں گرد آلود آندھی اور گرج چمک کے ساتھ بارش کا امکان ہے۔ اسی طرح بلوچستان کے اضلاع ژوب، خضدار، موسیٰ خیل اور بارکھان میں گرد آلود آندھی اور گرج چمک کے ساتھ بارش کا امکان ہے،گرج چمک، آندھی اورژالہ باری سے بجلی کے کھمبوں، درختوں، گاڑیوں اور سولر پینلز وغیرہ کو نقصان پہنچ سکتا ہے۔

کسانوں کو مشورہ دیا جاتا ہے کہ وہ گندم کی کٹائی سمیت زرعی سرگرمیاں موسم کی صورتحال کو مدنظر رکھتے ہوئے ترتیب دیں،ملک کے بیشتر حصوں میں یکم مئی سے ہیٹ ویو کی شدت میں کمی کا امکان ہے۔