لاہور میں ٹریفک لائسنس بنوانے والوں کیلئے جدید سہولت متعارف

جدید طرز کے ٹریفک کیاسک کا آغاز، مال روڈ پر ٹیکنالوجی سے مزین کیبن نصب کردیا گیا

ساجد علی بدھ 30 اپریل 2025 16:46

لاہور میں ٹریفک لائسنس بنوانے والوں کیلئے جدید سہولت متعارف

لاہور ( اُردو پوائنٹ اخبارتازہ ترین۔ 30 اپریل 2025ء ) صوبہ پنجاب کے دارالحکومت لاہور میں شہریوں کو سہولیات کی فراہمی کیلئے چوکوں اور چوراہوں پر تریفک لائسنس بنانے کی جدید سہولت متعارف کرادی گئی۔ اس حوالے سے چیف ٹریفک آفیسر (سی ٹی او) لاہور ڈاکٹر اطہر وحید نے بتایا کہ لاہور ٹریفک پولیس نے جدید ممالک کے طرز پر ٹریفک کیاسک کا آغاز کر دیا ہے، ابتدائی طور پر افشاں چوک مال روڈ پر جدید ٹیکنالوجی سے مزین کیبن نصب کیا گیا ہے جہاں شہری موٹر سائیکل کے لائسنس بنوانے اور ڈرائیونگ لائسنس وصول کرنے کی سہولیات سے مستفید ہو سکیں گے، ٹریفک کے متعلقہ تمام سہولیات اس کیاسک کے ذریعے فراہم کی جائیں گی، جب کہ چوک چوراہوں پر براہ راست لائسنس بنانے کی سہولت بھی مہیا کی جا رہی ہے۔

ان کا کہنا ہے کہ ٹریفک کنٹرول کے لیے کیاسک میں لاوڈ سپیکر سسٹم بھی نصب کیا گیا ہے، ٹریفک وارڈنز یہاں 24 گھنٹے ڈیوٹی انجام دیں گے اور ان کے لیے ٹھنڈے پانی، اے سی، آرام کرنے کی جگہ اور شدید موسم سے بچاؤ کی سہولیات بھی فراہم کی گئی ہیں، افشاں چوک کے بعد مال روڈ، گلبرگ، اقبال ٹاؤن سمیت دیگر علاقوں میں بھی مرحلہ وار ٹریفک کیاسک متعارف کروائے جائیں گے، یہ منصوبہ وزیر اعلیٰ پنجاب کی ہدایت پر عمل میں لایا جا رہا ہے جس کی نگرانی ایس پی ہیڈ کوارٹر منصور الحسن کر رہے ہیں۔

(جاری ہے)

علاوہ ازیں انسپکٹر جنرل پولیس پنجاب ڈاکٹر عثمان انور کی ہدایت پر پنجاب پولیس پبلک سروس ڈلیوری، ٹریفک قوانین پر عملدرآمد یقینی بنانے کے لئے ان ایکشن ہے، جس کے تسلسل میں گذشتہ 24 گھنٹوں کے دوران 29 ہزار 249 افراد کو ڈرائیونگ لائسنس جاری کیے گئے، ٹریفک قوانین کی خلاف ورزی پر36 ہزار سے زائد چالان اور 02 کروڑ 10 لاکھ روپے کے جرمانے عائد کیے گئے، دھواں چھوڑنے والی 531 گاڑیوں کے چالان کیے گئے جب کہ 40 کو تھانوں میں بند کیا گیا۔