یوٹیوبرکا گوری خان کے مہنگے ترین ریسٹورینٹ میں جعلی پنیرکھلانے کا الزام، انتظامیہ کو سوشل میڈیا پروضاحت دینی پڑی

جمعہ 18 اپریل 2025 13:30

ممبئی(اُردو پوائنٹ اخبارتازہ ترین - این این آئی۔ 18 اپریل2025ء)ایک بھارتی یوٹیوبر کی جانب سے دعویٰ کیا گیا ہے کہ بالی ووڈ کنگ شاہ رخ خان کی اہلیہ گوری خان کے مشہور اور مہنگے ترین ریسٹورینٹ میں کسٹمرز کو جعلی پنیر کھلایا جا رہا ہے۔بھارتی میڈیاکے مطابق حال ہی میں سارتھک سچدیوا نامی ایک یوٹیوبر نے اپنے سوشل میڈیا پر ایک ویڈیو شیئر کی جس میں وہ متعدد نامور بالی ووڈ اسٹارز کے ریسٹورینٹس میں گئے اور وہاں کھانا کھایا۔

یوٹیوبر سارتھک نے جن اسٹارز کے ریسٹورینٹس میں کھانا کھایا ان میں ویرات کوہلی، شلپا شیٹی، بوبی دیول کا نام سرفہرست ہے۔یوٹیوبر نے ہر ریسٹورینٹ میں پنیر سے بنی غذاؤں کا آرڈر دیا اور آئیوڈین ٹکنچر کی مدد سے پنیر کے اصلی ہونے سے متعلق ٹیسٹ کیا۔

(جاری ہے)

یوٹیوبر کی جانب سے کیے گئے ٹیسٹ میں متعدد فنکاروں کے ریسٹورینٹس میں بننے والے کھانے ان کے ٹیسٹ پر کھرے اترے جبکہ گوری خان کے توڑی میں پنیر کے اصلی ہونے کا ٹیسٹ کرتے ہوئے یوٹیوبر نے دعویٰ کیا کہ یہ پنیر نقلی ہے۔

یوٹیوبر نے اپنی ویڈیو کہاکہ توڑی میں پنیر کے ٹکڑے پر آئیوڈین لگانے سے اس کا رنگ سیاہ ہو گیا جس سے معلوم ہوتا ہے کہ یہ پنیر جعلی ہے کیوں کہ اس میں نشاستہ شامل ہے۔یوٹیوبر کی جانب سے انسٹا اکاؤنٹ پر شیئر کی گئی یہ ویڈیو سوشل میڈیا پر جنگل کی آگ کی طرح پھیل گئی اور نیٹیزنز میں گرما گرم بحث چھڑ گئی۔سوشل میڈیا پر بات یہاں تک پہنچ گئی کہ توڑی ریسٹورینٹ کو بھی اس تنازع میں کود کر اپنی گواہی دینی پڑ گئی۔

گوری خان کے ریسٹورینٹ توڑی کی انتظامیہ نے سوشل میڈیا پر وضاحت دیتے ہوئے کہا کہ آئیوڈین ٹیسٹ صرف نشاستے کی موجودگی ظاہر کرتا ہے، پنیر کی اصل یا نقل ہونے کا ثبوت نہیں دیتا، ہماری ڈشز میں سویا پر مبنی اجزا شامل ہوتے ہیں اسی لیے رنگ کی تبدیلی ایک متوقع رد عمل ہو سکتا ہے، ہم اپنے پنیر اور تمام اجزا کے خالص ہونے پر پورا بھروسہ رکھتے ہیں۔

ریسٹورینٹ کے وضاحتی کمنٹ کے بعد یوٹیوبر سارتھک نے مزاحیہ انداز میں جوابی تبصرہ کیا کہ تو کیا اب مجھ پر پابندی لگ گئی ہے ویسے آپ کا کھانا لاجواب ہے۔یاد رہے کہ اداکار شاہ رخ خان کی اہلیہ، گوری خان ناصرف مشہور انٹیریئر ڈیزائنر ہیں بلکہ ایک کاروباری شخصیت بھی ہیں، وہ ممبئی کے پوش علاقے میں ایک مہنگے ترین ریسٹورینٹ توڑی کی مالک ہیں۔