کراچی،اینٹی نارکوٹکس فورس کی کارروائیاں، بھاری مقدار میں منشیات برآمد

اے این ایف نے سہراب گوٹھ میں بس ٹرمینل اور ساتھ ایشین پورٹ پر کارروائیاں کیں، ترجمان

جمعہ 18 اپریل 2025 23:00

کراچی(اُردو پوائنٹ اخبارتازہ ترین - این این آئی۔ 18 اپریل2025ء)اینٹی نارکوٹکس فورس(اے این ایف)نے شہرکے علاقے سہراب گوٹھ میں بس ٹرمینل اور ساتھ ایشین پورٹ پر کارروائی کے دوران 54 کلوگرام چرس اور9.6کلوگرام ہیروئن برآمد کرلی۔ترجمان اے این ایف کے مطابق تعلیمی اداروں اور ملک کیمختلف شہروں میں منشیات اسمگلنگ کے خلاف کریک ڈان جاری ہے اور خفیہ اطلاع پرسہراب گوٹھ میں بس ٹرمینل کے قریب کارروائی کی گئی۔

انہوں نے بتایا کہ اس دوران 2گاڑیوں سے 54کلوگرام چرس برآمد کرکے دوملزمان کو گرفتار کیا گیا۔ترجمان نے بتایا کہ ایک اور کارروائی کے دوران شہرکے ساتھ ایشین پورٹ ٹرمینل پر ایک کنٹینر کے ائیرکنڈیشن یونٹ میں چھپائی گئی 9.6کلوگرام ہیروئن برآمد کی گئی۔ان کا کہنا تھا کہ اس موقع پر2ملزمان کی گرفتاری عمل میں آئی، دیگر کارروائیوں کے دوران سٹی بائی پاس سکھر کے قریب 4 خواتین سے 8 کلو چرس برآمد کی گئی۔

(جاری ہے)

ملک کے دیگر شہروں میں کی گئی کارروائیوں کے حوالے سے ان کا کہنا تھا کہ سرانان بازار پشین کے قریب گاڑی کے خفیہ خانوں سے 612 کلو افیون، سمبڑیال، سیالکوٹ میں یونیورسٹی کے قریب خاتون سمیت ملزم سے 800 گرام آئس، لاہور میں کوریئر آفس سے آسٹریلیا بھیجے جانے والے پارسل سے 510 گرام آئس، حاجی کیمپ پشاور میں ملزم سے 100 گرام نشہ آور گولیاں برآمد کی گئیں۔ترجمان اے این ایف کے مطابق کارروائیوں میں 17 کروڑ سے زائد مالیت کی 685 کلو گرام منشیات برآمد کی گئی۔انہوں نے بتایا کہ گرفتار ملزمان کے خلاف انسداد منشیات ایکٹ کے تحت مقدمات درج کرکے تحقیقات کا آغاز کر دیا گیا ہے۔