Live Updates

پی ایس ایل کے راکٹ مین کی بھونڈی نقل، آئی پی ایل روبوٹک کُتا میدان میں لے آئی

روبوٹک کتے نے بھی پی ایس ایل کے راکٹ مین کی طرح میچ کے آغاز سے قبل ٹاس کا سکہ کپتان کے سپرد کیا

ہفتہ 19 اپریل 2025 13:44

پی ایس ایل کے راکٹ مین کی بھونڈی نقل، آئی پی ایل روبوٹک کُتا میدان ..

نئی دہلی (اُردو پوائنٹ اخبارتازہ ترین - این این آئی۔ 19 اپریل2025ء)پاکستان سپر لیگ (پی ایس ایل 10) میں راکٹ مین کی شہرت سے مجبور ہو کر آئی پی ایل نے نقل میں روبوٹک کتا میدان میں اتار دیا۔دنیا کی مقبول ترین کرکٹ لیگز میں سے ایک پاکستان سپر لیگ (پی ایس ایل) نے اپنے دسویں ایڈیشن میں نئی ٹیکنالوجی کا استعمال کرتے ہوئے راکٹ مین متعارف کرایا۔اس کا چرچا جب دنیا میں ہوا تو انڈین پریمیئر لیگ بھی ٹیکنالوجی استعمال کرنے پر مجبور ہوگئی۔

تاہم نقل کے لیے بھی عقل درکار ہوتی ہے لیکن آئی پی ایل انتظامیہ نے بھونڈی نقل کرتے ہوئے ٹیموں کے میچ سے قبل ٹاس کے لیے میدان میں روبوٹک کتا لے آئی۔اس روبوٹک کتے نے بھی پی ایس ایل کے راکٹ مین کی طرح میچ کے آغاز سے قبل ٹاس کا سکہ کپتان کے سپرد کیا۔

(جاری ہے)

بی سی سی آئی اور آئی پی ایل انتظامیہ کی یہ بھونڈی نقل سوشل میڈیا صارفین کو ایک آنکھ نہ بھائی اور انہوں نے آئی پی ایل انتظامیہ کو آڑے ہاتھوں لیتے ہوئے اس کو پاکستان سپر لیگ کی نقالی مگر فلاپ شو قرار دیا۔

واضح رہیکہ پاکستان میں پی ایس ایل 10 اور بھارت میں آئی پی ایل 18 ایک ہی دورانیے میں جاری ہیں۔پی ایس ایل 10 کی افتتاحی تقریب اور میچ میں راکٹ مین نے فضا میں اڑنے کا شاندار مظاہرہ کیا تھا جس سے نہ صرف اسٹیڈیم اور پاکستان میں موجود شائقین کرکٹ بلکہ دنیا بھر کے شائقین محظوظ ہوئے جب کہ دیگر لیگ کے منتظمین متوجہ ہوئے تھے۔قابل ذکر یہ ہے کہ پی ایس ایل 10 میں راکٹ مین کی نمائش سے قبل آئی پی ایل میں روبوٹک کتا سمیت ایسا کوئی مظاہرہ نہیں کیا گیا تھا۔تاہم آئی پی ایل منتظمین کے اسٹنٹ کو پاکستان کی کاپی قرار دیا جارہا ہے، کئی صارفین نے سوشل میڈیا پلیٹ فارمز پر لیگ کا موازنہ کرنا بھی شروع کردیا ہے کہ کون سی لیگ زیادہ بہتر ٹیکنالوجی استعمال کررہی ہے۔