پاکستان کشمیری عوام کے حقِ خودارادیت کی بھرپور اور غیر متزلزل حمایت جاری رکھے گا، رانا قاسم نون

چیئرمین پارلیمانی کمیٹی برائے کشمیر رانا قاسم نون کی ایلچی برائے کشمیر سے ملاقات، او آئی سی کانفرنس اور اسلام آباد میں بین الاقوامی کشمیر کانفرنس پر گفتگو ْ

اتوار 20 اپریل 2025 13:10

اسلام آباد (اُردو پوائنٹ اخبارتازہ ترین - این این آئی۔ 20 اپریل2025ء)چیئرمین پارلیمانی کمیٹی برائے کشمیر رانا قاسم نون کی ایلچی برائے کشمیر سے ملاقات، او آئی سی کانفرنس اور اسلام آباد میں بین الاقوامی کشمیر کانفرنس پر گفتگو۔پارلیمانی کمیٹی برائے کشمیر کے چیئرمین رانا محمد قاسم نون نے ایلچی برائے کشمیر سے اہم ملاقات کی، جس میں مسئلہ کشمیر پر جاری سفارتی کوششوں، انسانی حقوق کی سنگین خلاف ورزیوں، اور آئندہ بین الاقوامی سرگرمیوں پر تبادلہ خیال کیا ۔

چیئرمین رانا قاسم نون نے کہا کہ پاکستان کشمیری عوام کے حقِ خودارادیت کی بھرپور اور غیر متزلزل حمایت جاری رکھے گا، اور اس مسئلے کو اقوامِ متحدہ کی قراردادوں کے مطابق حل کروانے کے لیے ہر ممکن فورم پر آواز بلند کی جائے گی۔

(جاری ہے)

ایلچی برائے کشمیر نے چیئرمین کو آئندہ او آئی سی کانفرنس میں شرکت کی دعوت دی، جہاں مسئلہ کشمیر کو نمایاں طور پر اجاگر کیا جائے گا۔

چیئرمین نے دعوت کا خیرمقدم کرتے ہوئے کہا کہ وہ اس اہم بین الاقوامی موقع پر کشمیری عوام کے حقیقی موقف کی ترجمانی کریں گے۔دونوں رہنماوں نے اس بات پر اتفاق کیا کہ عالمی برادری، پارلیمنٹس، انسانی حقوق کی تنظیموں، اور کشمیری تارکین وطن کے ساتھ موثر سفارتی روابط کو مزید وسعت دی جائے گی۔ چیئرمین نے ایک "کشمیر اسٹریٹیجک ایڈووکیسی سیل" کے قیام کی تجویز دی تاکہ پارلیمنٹ کے اندر موثر بین الاقوامی رابطہ کاری، بیانیے کی تشکیل، اور بروقت ردعمل کو یقینی بنایا جا سکے۔

عوامی سفارت کاری اور میڈیا حکمت عملی پر بھی تفصیلی گفتگو ہوئی، جس میں کشمیری ثقافت، ادب، نوجوانوں اور ڈیجیٹل پلیٹ فارمز کے ذریعے مسئلہ کشمیر کو عالمی سطح پر اجاگر کرنے کی ضرورت پر زور دیا گیا۔ملاقات کے دوران چیئرمین نون نے ایلچی برائے کشمیر کو اسلام آباد میں منعقد ہونے والی مجوزہ بین الاقوامی کشمیر کانفرنس میں شرکت کی دعوت دی، جس کا مقصد عالمی سطح پر اتحاد پیدا کرنا اور مسئلہ کشمیر کو موثر انداز میں اجاگر کرنا ہے۔ملاقات خوشگوار ماحول میں ہوئی اور دونوں جانب سے ادارہ جاتی تعاون اور سفارتی ہم آہنگی کو مزید فروغ دینے کے عزم کا اظہار کیا ۔