تھر میں گرمی سے 65مور ہلاک ہوگئے

موروں کو مرنے سے بچانے کیلئے سرکاری سطح پر کیے گئے اقدامات تاحال فائد مند ثابت نہ ہوسکے

اتوار 20 اپریل 2025 22:20

تھر(اُردو پوائنٹ اخبارتازہ ترین - این این آئی۔ 20 اپریل2025ء)صحرائے تھر میں قہر برساتی گرمی حساس اور خوبصورت پرندے مور کیلئے جان لیوا بن گئی،گرمی کی حالیہ لہر کے دوران 65سے زائد مور ہلاک ہوگئے اور ان موروں کو مرنے سے بچانے کیلئے سرکاری سطح پر کیے گئے اقدامات تاحال فائد مند ثابت نہ ہوسکے۔میڈیارپورٹ کے مطابق ضلع تھرپاکر میں جہاں گرمی کی شدت نے انسانوں کے معمولات زندگی کو متاثر کیا، وہیں صحرا کے حسین و جمیل مور پرندوں کیلئے بھی جان لیوا ثابت ہو گئی ہے۔

(جاری ہے)

مقامی افراد کا دعویٰ ہے کہ بیمار موروں کی تعداد سیکڑوں میں ہے، جن کا علاج نہ ہونے کے باعث روزانہ ایک درجن سے زائد یہ خوبصورت پرندے ہلاک ہوتے جارہے ہیں۔محکمہ وائلڈ لائف حکام نے تصدیق کی ہے کہ رواں ہفتے کے دوران تھرپارکر کی تحصیلوں مٹھی اسلام کوٹ اور ڈیپلو کے مختلف دیہی علاقوں میں 65مور پرندے ہلاک ہوگئے۔ موروں کی ہلاکت کی وجہ تو بتارہے ہیں لیکن بیمار موروں کے علاج کے اقدامات نہ ہونے کے برابر ہیں۔صحرائے تھر میں ہر سال بیماریوں اور خوراک کی کمی سے سیکڑوں مور ہلاک ہوجاتے ہیں۔ تھر کے ان موروں کی زندگی بچانے کے لیے محکمہ وائلڈ لائف کو عملی اقدامات اٹھانے پڑیں گے۔