واجبات جیسن گلیسپی نے ادا کرنے ہیں، سابق ہیڈ کوچ کے الزامات پر پی سی بی کا مؤقف

معاہدے میں فریقین کے 4 ماہ کے نوٹس کی شق موجود ہے، جیسن گلیسپی نے نوٹس نہیں دیا، واجبات اُن کی طرف نکلتے ہیں : ترجمان پی سی بی

ذیشان مہتاب پیر 21 اپریل 2025 11:27

واجبات جیسن گلیسپی نے ادا کرنے ہیں، سابق ہیڈ کوچ کے الزامات پر پی سی ..

لاہور (اردو پوائنٹ تازہ ترین اخبار ۔ 21 اپریل 2025ء ) پاکستان کی ٹیسٹ کرکٹ ٹیم کے سابق ہیڈکوچ جیسن گلیسپی کی جانب سے پاکستان کرکٹ بورڈ (پی سی بی) پر معاوضہ ادا نہ کرنے کے الزام پر پی سی بی کا مؤقف سامنے آگیا۔

ترجمان پی سی بی کا کہنا ہے کہ جیسن گلیسپی کے واجبات کی عدم ادائیگی کے الزامات میں حقیقت نہیں، سابق ہیڈ کوچ جیسن گلیسپی بغیر نوٹس دیے اپنا عہدہ چھوڑ گئے تھے۔

ترجمان پی سی بی کے مطابق معاہدے میں فریقین کے 4 ماہ کے نوٹس کی شق موجود ہے، جیسن گلیسپی نے نوٹس نہیں دیا، واجبات اُن کی طرف نکلتے ہیں، واجبات کے لیے جیسن گلیسپی کے ایجنٹ نے بھی بورڈ سے رابطہ کیا تھا، ایجنٹ کو بھی بورڈ نے آگاہ کیا تھا کہ جیسن گلیسپی پہلے واجبات کلیئر کریں، پھر باقی حساب بھی کلیئر کرلیں گے۔

(جاری ہے)

خیال رہے کہ ایک حالیہ انٹرویو میں جیسن گلیسپی کا کہنا تھا کہ ان کے دل میں پاکستان کرکٹ کے لیے کوئی منفی جذبات نہیں ہیں، تاہم انہوں نے یہ دعویٰ بھی کیا کہ انہیں اب تک 9 ماہ کی کوچنگ کا معاوضہ نہیں ملا۔

جیسن گلیسپی کا کہنا تھا کہ میں ابھی بھی اس کام کا معاوضہ ملنےکا منتظر ہوں جو میں نے کیا ہے، یہ تھوڑا مایوس کن ضرور ہے، امید ہےکہ یہ معاملہ جلد حل ہو جائےگا۔

اس سے قبل جیسن گلیسپی نے کہا تھا کہ پاکستان ٹیم کے ساتھ ان کے تجربے نے کوچنگ سے ان کی محبت کو متاثر کیا ہے، جیسے یہ سب ختم ہوا وہ مایوس کن تھا، اس نے مجھے یہ سوچنے پر مجبور کیا کہ کیا میں دوبارہ فل ٹائم کوچنگ کرنا چاہتا ہوں یا نہیں۔

اس سے پہلے وہ پاکستان کے عبوری ہیڈ کوچ عاقب جاوید پر ان کے اختیارات کو کمزور کرنے کا الزام بھی لگا چکے ہیں۔