راشد لطیف کا پاکستان کرکٹ میں میچ فکسنگ کے راز فاش کرنے کا اعلان

سب بتاؤں گا فکسنگ کیسے ہوتی تھی؟ کون کرتا تھا؟ ، یہ بھی بتاؤںگا کہ صدارتی معافی نامے کی درخواست کس سابق کپتان نے جمع کروائی تھی؟ : سابق کپتان

ذیشان مہتاب پیر 21 اپریل 2025 11:34

راشد لطیف کا پاکستان کرکٹ میں میچ فکسنگ کے راز فاش کرنے کا اعلان

کراچی (اردو پوائنٹ تازہ ترین اخبار ۔ 21 اپریل 2025ء ) قومی کرکٹ ٹیم کے سابق کپتان راشد لطیف نے پاکستان کرکٹ میں میچ فکسنگ کے راز فاش کرنے کی دھمکی دے دی۔

نجی ٹی وی چینل جیو ٹی وی پر گفتگو کرتے ہوئے 56 سالہ راشد لطیف نے کہا کہ کتاب لکھنا شروع کردی ہے، 90ء کی دہائی میں کرکٹ میچ فکسنگ کا عروج تھا۔

راشد لطیف نے اپنی کتاب میں بڑے انکشافات کا اعلان کرتے ہوئے کہا کہ سب بتاؤں گا فکسنگ کیسے ہوتی تھی؟ کون کرتا تھا؟۔

(جاری ہے)

ان کا کہنا تھا کہ 90 کے دور کی کرکٹ میں کیا کیا ہوتا رہا؟ یہ بھی بتاؤں گا اور یہ بھی بتاؤں گا کہ صدارتی معافی نامے کی درخواست کس سابق کپتان نے جمع کروائی تھی؟۔

2004ء میں ریٹائر ہونے کے بعد یہ پہلا موقع ہے جب راشد لطیف نے اپنی سوانح عمری جاری کرنے کے بارے میں بات کی ہے۔

راشد لطیف، جنہیں پاکستان کرکٹ کی تاریخ کے بہترین وکٹ کیپرز میں شمار کیا جاتا ہے، نے سب سے پہلے 1994ء میں میچ فکسنگ کے کرپشن اسکینڈل کی طرف توجہ دلائی جب انہوں نے اور سابق ٹیسٹ کرکٹر باسط علی نے جنوبی افریقا کے دورے کے دوران ریٹائرمنٹ کا اعلان کیا، دونوں کھلاڑیوں کا مؤقف تھا کہ وہ ڈریسنگ روم کے موجودہ ماحول میں مزید کھیل جاری نہیں رکھ سکتے۔