بلوچستان ہائی کورٹ نے کوئٹہ پریس کلب میں تقریبا ت کے لئے ڈپٹی کمشنر کی اجازت لینے کے حکم کو معطل کردیا

منگل 22 اپریل 2025 23:20

کوئٹہ(اُردو پوائنٹ اخبارتازہ ترین - این این آئی۔ 22 اپریل2025ء) جسٹس روزی خان بڑیچ اور جسٹس سردار احمد حلیمی پر مشتمل عدالت عالیہ بلوچستان کے دو رکنی ڈویژنل بنچ نے ایک آئینی درخواست کے اندر اپنے ایک عبوری حکم کے ذریعے ڈپٹی کمشنر کوئٹہ کا 27 اگست 2024 کے حکم جس میں پریس کلب کوئٹہ میں تقریبات کیلئے ضلعی انتظامیہ سے پیشگی اجازت لینے کی شرط رکھی گئی تھی کو معطل کرتے ہوئے مقدمے کو ایک ہفتے کے لیے ملتوی کر دیا۔

15 اپریل 2025 کو اسسٹنٹ ایڈوکیٹ جنرل نے عدالت کو اس نکتے پر مطمئن کرنے کے لیے وقت مانگا کہ ڈپٹی کمشنر کس قانون کے تحت کسی بھی تنظیم یا سیاسی جماعت کو ضلعی انتظامیہ کے این او سی کے بغیر پریس کلب میں کانفرنس یا سیمینار منعقد کرنے سے روکنے کے حوالے سے کوئی حکم دینے کا مجاز ہے۔

(جاری ہے)

آج، اسسٹنٹ ایڈوکیٹ جنرل نے کہا کہ وہ پہلے ہی اس کا جواب جمع کرا چکے ہیں، جو غیر تسلی بخش ہے کیونکہ یہ اسلامی جمہوریہ پاکستان 1973 کے آئین کے آرٹیکل 19 کی خلاف ورزی کے مترادف ہے جس میں کہا گیا ہے کہ 'ہر شہری کو آزادی اظہار اور اظہار رائے کا حق حاصل ہوگا، اور پریس کی آزادی ہوگی. مندرجہ بالا کے پیش نظر، ماہر اسسٹنٹ ایڈوکیٹ جنرل کو ہدایت کی گئی ہے کہ وہ اگلی تاریخ سماعت کو تفصیلی رپورٹ پیش کریں۔

سیکرٹری پریس کلب کوئٹہ کو بھی نوٹس جاری کرتے ہوئے ہدایت کی گئی ہے کہ وہ اگلی تاریخ سماعت تک یا اس سے پہلے اس حوالے سے رپورٹ پیش کریں۔