-لیسکو ہماری ماں ہے، اس کی خدمت ہمارا نصب العین ہے، چیف ایگزیکٹو لیسکو انجینئر محمد رمضان بٹ کا فنکشنل ہیڈ کے اجلاس سے خطاب

منگل 22 اپریل 2025 20:55

+لاہور (اُردو پوائنٹ اخبارتازہ ترین - آن لائن۔ 22 اپریل2025ء) لاہور الیکٹرک سپلائی کمپنی کے ہیڈکوارٹر میں چیف ایگزیکٹو لیسکو انجینئر محمد رمضان بٹ کی زیر صدارت فنکشنل ہیڈز کا اجلاس ہوا جس میں جی ایم آپریشن اعجاز بھٹی، ڈی جی ایمپلیمنٹیشن رائے محمد اصغر، چیف فنانس آفیسر احمد سعید، ڈائریکٹر کسٹمر سروس عباس علی، ڈائریکٹر ہیومن ریسوس ضمیر حسین کلاچی، ڈی جی ایڈمن معصومہ عادل، چیف انفارمیشن ٹیکنالوجی آفیسر عثمان علی، چیف لیگل آفیسر، ڈی جی میراڈ محمد حسین، چیف انجینئر پی ایم یو عمران محمود، چیف انجینئر پلاننگ فیصل زکریا، چیف انجینئرٹی ایس ڈیزائن نثار سرور اور منیجر سیفٹی فواد خالد نے شرکت کی۔

اجلاس سے خطاب کرتے ہوئے چیف ایگزیکٹو لیسکو انجینئر محمد رمضان بٹ کا کہنا تھا کہ ہم آج جو کچھ بھی ہیں وہ اس ادارے کے بدولت ہیں، اس ادارے نے ہماری زندگیوں میں ماں کا کردار ادا کیا ہے کہ لہٰذا اب ہمارا فرض بنتا ہے کہ ہم بھی اس ادارے کی بھرپور خدمت کریں۔

(جاری ہے)

انہوں نے کہا کہ لیسکو کے پاس اس وقت وفاقی وزیر اویس لغاری ،چیئرمین بی او ڈی عامر ضیااور بورڈ ممبران کی صورت میں بہترین قیادت موجود ہے جبکہ ہمارے پاس اعلیٰ تربیت یافتہ افسران اور ملازمین کی بھی کوئی کمی نہیں،اس وقت پاور سیکٹرکو بحران سے نکالنے کے لیے ملکی قیادت اور ادارے ایک پیج پر ہیں، ہم تھوڑی سی محنت کرکے اس ادارے کو عروج تک پہنچا سکتے ہیں۔

انہوں نے کہا کہ لیسکو ایک ٹرینڈ سیٹر ادارہ ہے، جس کے اقدامات کی تمام ڈسکوز پیروی کرتی ہیں، ہمیں اسی روایت کو برقرار رکھتے ہوئے فیوچر پلان ترتیب دینا ہے۔