شہریوں کو ڈینگی مچھر سے محفوظ رکھنے کے موثر طریقوں سے آگاہ کرنے کے لئے دستیاب ذرائع استعمال کئے جائیں، ڈپٹی کمشنرفیصل آباد

جمعرات 24 اپریل 2025 21:50

فیصل آباد (اُردو پوائنٹ اخبارتازہ ترین - اے پی پی۔ 24 اپریل2025ء) ڈپٹی کمشنرفیصل آباد کیپٹن (ر) ندیم ناصرنے کہا ہے کہ شہریوں کو ڈینگی مچھر سے محفوظ رکھنے کے موثر طریقوں سے آگاہ کرنے کے لئے تمام دستیاب ذرائع استعمال کئے جائیں۔ ان خیالات کااظہار انہوں نے ڈینگی آگاہی سے متعلق منعقدہ اجلاس کی صدارت کرتے ہوئے کیا۔ڈپٹی کمشنر نے ڈینگی کے پھیلاؤ کو روکنے کے لئے اٹھائے جانے والے حفاظتی اقدامات اور عوامی سطح پر شعور بیدار کرنے کی کوششوں کو مزید فعال کرنے کی ہدایت کی۔

ڈپٹی کمشنر ندیم ناصر نے تمام متعلقہ محکموں کے افسران کو سختی سے ہدایت کی کہ وہ ڈینگی کی روک تھام کے لئے اپنی تمام تر توانائیاں صرف کریں اور اس اہم قومی فریضے میں کسی قسم کی کوتاہی ناقابل قبول ہوگی۔

(جاری ہے)

انہوں نے مزید کہا کہ ضلع بھر میں صفائی کے نظام کو مزید بہتر بنایا جائے اور کسی بھی جگہ پر کھڑا پانی جمع نہ ہونے دیا جائے کیونکہ یہ ڈینگی مچھروں کی افزائش کا بڑا سبب بنتا ہے۔

انہوں نے شہریوں سے بھی اپیل کی کہ وہ اپنے اردگرد کے ماحول کو صاف ستھرا رکھیں اور ڈینگی سے بچاؤ کے لئے احتیاطی تدابیر اختیار کریں۔اجلاس میں ایڈیشنل ڈپٹی کمشنر جنرل کیپٹن (ر)طیب سمیع،اسسٹنٹ کمشنرز سٹی عتیق اللہ،صدر ذوالقرنین،محکمہ صحت، میونسپل کارپوریشن اور دیگر متعلقہ اداروں کے افسران نے شرکت کی اور اپنی اپنی کارکردگی کے بارے ڈپٹی کمشنر کو آگاہ کیا۔ ڈپٹی کمشنر نے تمام محکموں کے درمیان قریبی رابطہ کاری پر زور دیا تاکہ ڈینگی کے خلاف جاری اس مہم کو کامیابی سے ہمکنار کیا جا سکے۔