Live Updates

پرویز سندھیلا اور فرسٹ سیکریٹری سفارتخانہ بیجلیئم کاگنٹواس ہاکی کلب کا دورہ،ہاکی ٹیموں کے ممکنہ دورہ پاکستان کے حوالے سے تبادلہ خیال

جمعہ 25 اپریل 2025 14:40

بیلجیم (اُردو پوائنٹ اخبارتازہ ترین - این این آئی۔ 25 اپریل2025ء)پرائم منسٹر یوتھ پروگرام کے فوکل پرسن برائے یوتھ افیئرز چوہدری پرویز علی سندھیلا اور پاکستان میں تعینات بیجلیئم سفارت خانے کے فرسٹ سیکرٹری اینڈریس جائیلز نے معروف یورپین کلب گنٹواس ہاکی کلب کا دورہ کیا۔اس دورے کے دوران بیلجیئم کی ہاکی ٹیموں کے ممکنہ دورہ پاکستان کے حوالے سے تبادلہ خیال کیا گیا، جس کا مقصد دونوں ممالک کے مابین کھیلوں کے میدان میں تعلقات کو فروغ دینا ہے۔

اس موقع پر حال ہی میں یورپین چیمپئن کا اعزاز حاصل کرنے والے پاکستانی نڑاد ہاکی کوچ محمد نعیم کو بھرپور انداز میں مبارک باد پیش کی گئی۔محمد نعیم کی یہ شاندار کامیابی ناصرف ان کے لیے بلکہ پاکستان کے لیے بھی باعثِ فخر ہے، جس سے عالمی سطح پر پاکستانی ٹیلنٹ کی پہچان مزید مستحکم ہوئی ہے۔

(جاری ہے)

چوہدری پرویز علی سندھیلا نے اپنے خیالات کا اظہار کرتے ہوئے کہا کہ محمد نعیم جیسے باصلاحیت افراد کی کامیابیاں اس بات کا ثبوت ہیں کہ اگر ہمارے نوجوانوں کو مواقع فراہم کیے جائیں تو وہ دنیا کے کسی بھی میدان میں ملک و قوم کا نام روشن کر سکتے ہیں۔

انہوں نے کہا کہ پاکستان میں ہاکی کے شاندار ماضی کو مدِ نظر رکھتے ہوئے اب وقت آ گیا ہے کہ ہم ایک مرتبہ پھر اس کھیل کو وہی مقام دلائیں جس کا یہ حق دار ہے، حکومتِ پاکستان، خاص طور پر پرائم منسٹر یوتھ پروگرام نوجوان کھلاڑیوں کی حوصلہ افزائی اور بین الاقوامی سطح پر مواقع فراہم کرنے کے لیے بھرپور اقدامات کر رہا ہے۔چوہدری پرویز علی سندھیلا نے اس موقع پر چیئرمین یوتھ پروگرام رانا مشہود احمد خان کی اس ہدایت کا بھی حوالہ دیا کہ پاکستان کے نوجوانوں کو یورپ سمیت دنیا بھر میں مواقع فراہم کیے جائیں گے تاکہ وہ اپنی صلاحیتوں کو عالمی سطح پر منوا سکیں۔

اٴْنہوںنے کہاکہ پاکستان کے نوجوانوں میں بے پناہ ٹیلنٹ ہے اور اب حکومتی سطح پر ان کے لیے دروازے کھولے جا رہے ہیں۔اس دورے نے ہاکی کے فروغ اور پاکستان کے عالمی کھیلوں میں مقام کی بحالی کے لیے ایک مثبت پیغام دیا ہے، یہ توقع کی جا رہی ہے کہ جلد ہی بیلجیئم کی ہاکی ٹیمیں پاکستان کا دورہ کریں گی، جو کھیل کے میدان میں دوستی اور ہم آہنگی کو مزید فروغ دے گا۔