ساڑھے 5 کروڑ روپے سے زائد مالیت کی منشیات پکڑی گئی، ملزمان گرفتار

گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا

ہفتہ 26 اپریل 2025 11:55

راولپنڈی(اُردو پوائنٹ اخبارتازہ ترین - این این آئی۔ 26 اپریل2025ء)اے این ایف نے ساڑھے 5 کروڑ روپے سے زائد مالیت کی منشیات پکڑ کر ملزمان کو گرفتار کرلیا۔ترجمان کے مطابق اینٹی نارکوٹکس فورس (اے این ایف) کا تعلیمی اداروں اور ملک کے مختلف شہروں میں منشیات اسمگلنگ کے خلاف کریک ڈاؤن جاری ہے، اس دوران 7 مختلف کارروائیوں کے دوران 8 ملزمان کو گرفتار کرکے 5 کروڑ 57 لاکھ روپے سے زائد مالیت کی 140.513 کلو گرام منشیات برآمد کرلی گئی۔

باغ ناران پارک پشاور کے قریب گاڑی سے 2 کلوگرام چرس، 500 عدد ایکسٹی گولیاں اور پستول برآمد کرکے 3 ملزمان کو گرفتار کرلیا گیا۔ ملزمان نے تعلیمی اداروں کے طلبہ کو منشیات فروخت کرنے کا اعتراف بھی کیا ہے۔حیات آباد (پشاور) میں کوریئر آفس میں جھنگ بھیجے جانے والے پارسل سے 30 عدد ایکسٹی گولیاں برآمد ہوئیں، اُدھر گلبرگ (لاہور) میں واقع کوریئر آفس میں آسٹریلیا بھیجے جانے والے پارسل سے 8 کلو 400 گرام آئس برآمد کی گئی۔

(جاری ہے)

علاوہ ازیں کالا شاہ کاکو ٹول پلازہ (لاہور) کے قریب ٹرک سے 14 کلو 400 افیون اور 34 کلو 800 گرام چرس برآمد کرکے 3 ملزمان کو گرفتار کرلیا گیا۔اسی طرح کراچی میں سپر ہائی وے پر بسم اللہ مارکیٹ کے قریب ملزم کے بیگ سے 13 کلو 200 گرام چرس برآمد کی گئی۔ اُدھر حیدر آباد کے علاقے قاسم آباد میں مسافر بس میں سوار ملزم سے 8 کلو 400 گرام چرس برآمد کرلی گئی۔ حب (بلوچستان) کے علاقے وندر میں غیر آباد علاقے میں اسمگلنگ کی غرض سے چھپائی گئی 41 کلو افیون اور 18 کلو ہیروئن برآمد ہوئی۔گرفتار تمام ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔