عازمین حج کے لیے ایک لاکھ 50 ہزار نسک کارڈ جاری

نسک کارڈز سے سکیورٹی اہلکاروں کو اس کی جانچ میں آسانی ہو گی،وزارت حج وعمرہ

ہفتہ 26 اپریل 2025 12:35

ریاض(اُردو پوائنٹ اخبارتازہ ترین - این این آئی۔ 26 اپریل2025ء)سعودی وزارت حج و عمرہ نے رواں سال عازمین حج کے لیے نسک کا رڈز کی تقسیم کے آغاز سے اب تک ایک لاکھ 50 ہزار کارڈز جاری کیے جا چکے ہیں۔عرب ٹی وی کے مطابق وزارت حج و عمرہ کی جانب سے نسک کارڈ انتہائی اعلی معیار کے پرنٹنگ کمپنی میں تیار کیے جا رہے ہیں جس میں بہترین سکیورٹی فیچرز ہیں۔رواں سال کے لیے تیار کیے جانے والے نسک کارڈز کی خاصیت یہ ہے کہ گرائونڈ پر موجود سکیورٹی اہلکاروں کو اس کی جانچ میں آسانی ہو گی۔

(جاری ہے)

نسک کارڈ کو مکمل طورپر محفوظ بنایا گیا ہیتاکہ جعل سازی سے بچایا جا سکے۔کارڈ میں عازم حج کی تمام معلومات موجود ہیں جن میں مکہ مکرمہ ، مدینہ منورہ اور مشاعرمقدسہ (منی، عرفات اور مزدلفہ) کے ایڈریس اور کمپنی کے بارے میں مکمل معلومات و اہم ٹیلی فون نمبر دیے گئے ہیں تاکہ عازم حج کو کسی قسم کی دشواری کا سامنا نہ کرنا پڑے۔بیرون مملکت سے آنے والے عازم حج کو ان کا کارڈ مملکت پہنچتے ہی دیا جاتا ہے جبکہ اندرون مملکت سے داخلی حجاج کے لیے کارڈز حج ایام شروع ہونے سے چند دن قبل دیے جائیں گے۔