میانمار،خوفناک زلزلے کی پیشگوئی کرنے والا نجومی گرفتار

نجومی نے ٹک ٹاک پر پیشگوئی کی تھی جسے لوگ حقیقت سمجھ بیٹھے،رپورٹ

ہفتہ 26 اپریل 2025 14:10

ینگون(اُردو پوائنٹ اخبارتازہ ترین - این این آئی۔ 26 اپریل2025ء)میانمار کے حکام نے ٹک ٹاک ویڈیو میں خوفناک زلزلے کی پیشگوئی کرنے والے نجومی کو گرفتار کر لیا، نجومی کی پیشگوئی نے عوام میں خوف و ہراس پھیلا دیا تھا۔عرب ٹی وی کے مطابق نجومی جان مو تھی نے 9 اپریل کو زلزلے کی پیشگوئی پر مبنی ایک ویڈیو پوسٹ کی تھی، جو اس وقت سامنے آئی جب صرف دو ہفتے قبل ایک 7.7 شدت کے زلزلے نے جنوب مشرقی ایشیائی ملک میانمار میں 3,500 افراد کی جان لے لی تھی اور تاریخی مندروں کو تباہ کر دیا تھا۔

ویڈیو میں جان مو تھی نے خبردار کیا کہ 21 اپریل کو میانمار کے ہر شہر میں زلزلہ آئے گا۔ٓ اس نے لوگوں کو ہدایت دی تھی کہ زلزلے کے جھٹکوں کے دوران فورا عمارتوں سے باہر نکلیں، اہم چیزیں اپنے ساتھ لیں، اور عمارتوں سے دور بھاگ جائیں۔

(جاری ہے)

ویڈیو کے کیپشن میں مزید تنبیہ کی گئی تھی کہ شہریوں کو دن کے وقت اونچی عمارتوں میں رہنے سے گریز کرنا ہوگا۔

نجومی کی ٹک ٹاک ویڈیو کو 30 لاکھ سے زائد بار دیکھا گیا۔میانمار کی وزارتِ اطلاعات کے مطابق نجومی جان مو تھی کو جھوٹے بیانات دے کر عوام میں خوف پھیلانے کے الزام میں منگل کے روز گرفتار کیا گیا۔ ماہرین زلزلہ نے واضح کیا ہے کہ زلزلوں کی پیش گوئی ممکن نہیں ہے کیونکہ ان میں کئی پیچیدہ عوامل شامل ہوتے ہیں۔رپورٹ کے مطابق نجومی کی پیشگوئی کو لوگوں نے اتنی سنجیدگی سے لیا کہ علاقے میں کئی لوگ اس ویڈیو پر یقین کر کے 21 اپریل کی رات گھروں کے بجائے باہر سوئے۔