امریکی صدر نہ برطانوی بادشاہ: دنیا کا واحد شخص جو بنا کسی ویزہ کے کسی بھی ملک جاسکتا ہے

․ویٹی کن سٹی (اُردو پوائنٹ اخبارتازہ ترین - آن لائن۔ 26 اپریل2025ء) پوپ فرانسس کو دنیا بھر میں ایک خاص اور منفرد مقام حاصل تھا کہ وہ جب کسی ملک کا دورہ کرتے ہیں تو انہیں ریاستی مہمان کا درجہ دیا جاتاتھا۔ اس لیے ان پر ویزا اور پاسپورٹ کے عام قوانین لاگو نہیں ہوتے۔ایک رپورٹ کے مطابق پوپ فرانسس نے اب تک 50 سے زائد ممالک کا سفر کیا ہے، اور ان میں سے زیادہ تر میں انہیں ویزے کی ضرورت نہیں پڑی۔

وہ ویٹیکن سٹی کے سفارتی پاسپورٹ پر سفر کرتے ، جو دنیا کے بیشتر ممالک میں بغیر ویزے کے داخلے کی اجازت دیتا ہے۔دنیا کے دوسرے بادشاہوں یا سربراہان کو بھی بعض اوقات پاسپورٹ کی ضرورت نہیں پڑتی، جیسے کہ برطانیہ کے بادشاہ، مگر پوپ کو ایک مذہبی اور سفارتی حیثیت حاصل ہے، جو انہیں سب سے الگ اور خاص بناتی ہے۔

(جاری ہے)

جب بھی پوپ کسی ملک جاتے ہیں، وہ وہاں کے اعلیٰ حکام سے ملاقات کرتے ہیں، عبادت گاہوں کا دورہ کرتے ہیں، اور دنیا بھر کے امن، محبت اور بھائی چارے کا پیغام دیتے ہیں۔

1929 میں اٹلی اور ویٹیکن کے درمیان ہونے والے معاہدے کے بعد ویٹیکن کو ایک آزاد ریاست کا درجہ ملا۔ اس معاہدے کے بعد پوپ کو مکمل سفارتی استثنیٰ حاصل ہو گیا، جس کا مطلب یہ ہے کہ پوپ دنیا میں کہیں بھی خاص اجازت کے بغیر سفر کر سکتے ہیں۔ 1961 کے ویانا کنونشن کے تحت بھی پوپ کی اس خصوصی حیثیت کو تسلیم کیا گیا ہے۔دنیا کے بیشتر ممالک میں پوپ کو ایک روحانی اور سفارتی شخصیت کے طور پر دیکھا جاتا ہے۔

وہ جہاں بھی جاتے ہیں، انہیں ریاستی مہمان سمجھا جاتا ہے۔ برطانوی بادشاہت جیسے اعلیٰ سفارتی ادارے بھی اتنی وسیع چھوٹ کے حامل نہیں جتنی کہ پوپ کو حاصل ہے۔کبھی کبھار چین یا روس جیسے ممالک پوپ کے دوروں پر سیاسی شرائط لگا سکتے ہیں، مگر تکنیکی طور پر پوپ کو وہاں بھی ویزے کی ضرورت نہیں ہوتی۔پوپ جب بین الاقوامی سفر پر جاتے ہیں تو وہ اپنے نجی طیارے کے ذریعے سفر کرتے ہیں جسے ’’شیفرڈ ون‘‘ کہا جاتا ہے۔

یہ نام پوپ کے مذہبی کردار سے لیا گیا ہے، کیونکہ پوپ کو ’’خدا کے گلہ کا چرواہا‘‘ مانا جاتا ہے۔اگرچہ شیفرڈ ون کوئی مستقل طیارہ نہیں، لیکن پوپ کے دورے کے لیے مخصوص طور پر تیار کیا جاتا ہے۔ یہ طیارہ اکثر الیطالیہ یا میزبان ملک کی قومی ایئر لائن فراہم کرتی ہے۔ پوپ کے لیے استعمال ہونے والے جہاز عام طور پر بوئنگ 787 یا ایئربس A330 جیسے بڑے اور آرام دہ طیارے ہوتے ہیں۔پوپ کی یہ منفرد حیثیت اور عالمی رسائی انہیں دنیا کی سب سے طاقتور روحانی شخصیتوں میں سے ایک بناتی ہے۔