ڈیجیٹل والٹس کے جدید نظام سے 79 فیصد رقوم ڈیجیٹل طریقے سے مستحقین تک پہنچائی گئیں، وزیراعظم محمد شہبازشریف

پیر 28 اپریل 2025 20:12

اسلام آباد (اُردو پوائنٹ اخبارتازہ ترین - اے پی پی۔ 28 اپریل2025ء) وزیراعظم محمد شہباز شریف نے رمضان ریلیف پیکیج کے تحت مستحق افراد کو شفاف ادائیگیوں کو سراہتے ہوئے کہا ہے کہ ڈیجیٹل والٹس کے جدید نظام سے 79 فیصد رقوم ڈیجیٹل طریقے سے مستحقین تک پہنچائی گئیں۔ پیر کو وزیراعظم آفس کے میڈیا ونگ کی جانب سے جاری بیان کے مطابق وزیراعظم رمضان ریلیف پیکیج کی کامیابی اور مستحقین تک رقوم کی ڈیجیٹل فراہمی کے لئے نمایاں کارکردگی کا مظاہرہ کرنے والوں کی پذیرائی کے لیے ایک خصوصی تقریب وزیراعظم ہاؤس اسلام آباد میں منعقد ہوئی جس میں وزیراعظم محمد شہباز شریف نے بطور مہمان خصوصی شرکت کی۔

تقریب کے شرکا سے خطاب کرتے ہوئے وزیراعظم نے کہا کہ رمضان ریلیف پیکیج کی کامیابی کے لئے تمام سٹیک ہولڈرز کی کاوشیں قابل تعریف ہیں۔

(جاری ہے)

انہوں نے کہا کہ پیکیج کے تحت مستحق افراد کا وقار برقرار رکھتے ہوئے شفاف انداز میں ادائیگیاں کی گئیں ، ادائیگی کے جدید طریقہ کار سے رقوم کی منتقلی ممکن ہوئی ۔ انہوں نے کہا کہ ڈیجیٹل والٹس کے ذریعے رقوم کی منتقلی انتہائی سہل اور شفاف رہی، پروگرام کے تحت 79 فیصد رقوم ڈیجیٹل طریقے سے ادا کی گئیں ۔

انہوں نے کہا کہ ادائیگی کے پرانے نظام میں بہت خامیاں تھیں جو کہ اس جدید نظام سے دور ہوئیں ، نظام کو جدید خطوط پر استوار کرنے کے لئے اقدامات کے مثبت نتائج سامنے آئے۔ وزیراعظم نے کہا کہ ڈیجیٹل والٹ کے دائرہ کار کو ملک بھر میں توسیع دیں گے ، مربوط نظام کے ذریعے ڈیجیٹل ادائیگیوں کے عمل میں صوبوں کو بھی شامل کریں گے۔انہوں نے کہا کہ الحمدللہ ٹیم ورک کی بدولت مستحق خاندانوں کو رقوم کی فراہمی ممکن ہوئی ، آئندہ سال ڈیجیٹل طریقے سے 100 فیصد فنڈز کا استعمال یقینی بنائیں گے۔

تقریب میں سیکرٹری بے نظیر انکم سپورٹ پروگرام عامر احمد علی نے پی ایم رمضان ریلیف پیکیج اور ڈیجیٹل والٹس کے حوالے سے تفصیلی بریفنگ دی۔وزیراعظم نے پی ایم رمضان ریلیف پیکیج کے نفاذ میں اہم کردار ادا کرنے والے سرکاری اور نجی اداروں کے افسران کی خدمات کے اعتراف میں انہیں اعزازی شیلڈز دیں۔